e-Vanġelu

B'liema Prezz?

2012-02-01T01:30:00.000+01:00

X’tagħtuni, staqsa Ġuda, biex nagħtikom lil Ġesù?

Ma titwemminx! Kif jista’ jkun li bniedem jasal biex ibiegħ lil ħabibu? Kif jista’ jittradixxi lill-Imgħallem tiegħu minkejja li qatt m’għamillu l-iċken deni, u li minnu ħlief ġid u mħabba ma rax?

Ġuda biegħu għal tletin biċċa tal-fidda – biċċa tal-fidda kienet tiswa madwar 200 ewro. Tletin biċċa jiġu bejn wieħed u ieħor €6000.

Għal daqshekk biegħu lil Ġesù – x’biċċa negozju miżerabbli! Kif tbiegħ lil Dak li jiswa aktar mid-dinja bi ftit muniti?

Ma kinitx storja ta’ darba. Sal-lum ħafna għadhom, għall-imħabba tal-flus, ibiegħu u jittradixxu lil Ġesù. Għandhom wisq x’jagħmlu. Imħabbtin wisq bix-xogħol, bil-part-time u bil-business. M’għandhomx ħin għalih. Żgur ma jriduhx fin-nofs meta jidħol negozju u ħlas ta’ VAT u taxxi.

B’hekk idaħħlu fil-but ftit aktar karti, waqt li jħallu barra minn qalbhom lil Dak li jista’ jagħnihom b’teżori li jibqgħu għall-ħajja ta’ dejjem.

Jien ukoll, li nqis lili nnifsu dixxiplu ta’ Kristu, nista’ nirrepeti l-istess żball. Ma ninsiex li Ġuda kien wieħed mit-Tnax u kien jiekol u jgħix miegħu. Jista’ jiġrili bħalu jekk, minflok ngħożż lil Ġesù, nippreferi l-għana u l-ġid tad-dinja.

Imma fl-aħħar mill-aħħar lil Ġesù ma nistgħux inbigħuh. Jekk xejn inkunu nbiegħu ruħna għat-telfien ta’ dejjem jekk inparttu l-imħabba ta’ Kristu mal-imħabba tal-flus.

Kristu għamel bil-kontra. Hu ħabb lil knisja, u ma warrabhiex minkejja l-ħafna difetti tagħha, imma ħallas għalija bi prezz li jisboq bil-bosta l-fidda u d-deheb. Kristu kiseb il-knisja billi ta ħajtu għaliha meta xerred demmu għall-fidwa tagħha.

Bħat-Tfal Żgħar

2012-01-01T00:30:00.000+01:00

It-tfal żgħar jiddependu għalkollox fuq il-ġenituri. L-omm u l-missier jipprovdulhom x’jieklu u x’jixorbu, ilibbsuhom u jagħtuhom kenn u affezzjoni. Mhux ta’ b’xejn li t-tfal żgħar jafdaw lill-ġenituri tagħhom.

Darba t-tifel tiegħi John kien qiegħed jilgħab fil-ġnien tan-nannu. Kellu ftit aktar minn sena għax kien għadu kemm telaq jimxi. Aljenajt rasi għal żewġ minuti u bla ma naf kif, it-tifel irnexxielu jitla’ fuq il-kamra tal-għodda. It-tifel kien fil-periklu li jaqa’ għal isfel u jweġġa’.

Mort malajr taħtu, ftaħt idejja u għidtlu, ‘John, ejja!’

It-tifel ma ħasibhiex darbtejn. Fil-pront qabeż għal isfel u jien ilqajtu f’dirgħajja. Ma nafx x’għadda minn moħħu, imma evidentement it-tifel kien żgur li jien ma kontx se nidħaq bih u li kont b’saħħti biżżejjed biex nilqgħu. Jew forsi ma ħaseb xejn - sempliċement emmen fija u obdieni.

Mhux dan li ried ifisser l-Imgħallem meta qalilna li jeħtieġ li nsiru bħat-tfal? ‘Tassew ngħidilkom, li jekk intom ma terġgħux issiru bħat-tfal iż-żgħar, żgur li ma tidħlux fis-Saltna tas-Smewwiet’ (Mattew 18:3).

Alla l-Missier iridna nafdawh bħalma t-tfal żgħar jafdaw lil missierhom.

Mhux bilfors nifhmu għaliex Alla jippermetti li ngħaddu minn inkwiet u tbatija. Infatti meta ma nifhmux, aktar u aktar għandna nafdaw fih. Għax hu egħref minna. Hu fil-kontroll perfett ta’ kulma jiġri, sew tajjeb kif ukoll ħażin. Fuq kollox, Alla hu mħabba.

Meta l-qalb miġugħa titniegħed, meta xejn ma jagħmel sens, u meta jidher li m’hemmx Alla jew li Alla telaqna, is-silenzju tiegħu huwa t-tweġiba li għandna bżonn. F’mument ta’ kriżi, l-imġarrab jista’ jirribella u jiċħad ’l Alla, jew jista’ jerġa’ jsir bħal tifel ċkejken, u f’dak is-skiet jissottometti ruħu għar-rieda tal-Missier u jafda fih aktar minn qatt qabel. Skont kif inwieġbu, it-tiġrib ikissirna jew isaħħaħ il-fidi tagħna.

Ma nafx x’hemm lest għalina matul is-sena li ġejja; naf biss li mat-tajjeb u s-sabiħ, l-inkwiet u l-ikraħ mhux se jkunu wisq ’il bogħod. Meta nsib ruħi fl-għawġ u l-periklu, irrid nisma’ s-sejħa ta’ Missieri, ‘Joe, ejja!’ – u naqbeż fis f’dirgħajh sodi u ħanina.

DVD tal-Futur

2011-12-01T22:13:00.000+01:00

It-tifel issa dalwaqt jagħlaq erba’ snin. Dan l-aħħar John talabna xi ħaġa mhix tas-soltu. Ried jara video tal-futur!

Kien qed jara DVD ta’ meta kien għadu tarbija tat-twelid. Affixina ruħu jara lil ommu tqila u lilu nnifsu daqs naqra. X’ħin spiċċa qalilna, ‘Mama nara DVD John kbir.’

Nimmaġina li rraġuna: ladarba nistgħu naraw il-passat, għaliex ma nistgħux naraw il-futur ukoll? Interessanti, imma għalissa għadu ma jistax jarah għax dak id-DVD għadna qed naħdmu fuqu.

Hemm diversi films fittizji fuq il-futur, imma hemm wieħed li huwa veru u ġenwin. Alla, l-awtur tal-istorja u li jaf it-tmiem mill-bidu, tana album b’diversi xeni mill-passat u oħrajn li għad iridu jseħħu.

Fil-Bibbja għandna ritratt mill-isbaħ taż-żjara ta’ l-Iben etern t’Alla fid-dinja meta twieled mill-verġni mbierka. Ritratti oħra juru l-imħabba u l-qawwa ta’ Ġesù speċjalment fl-għemejjel ta’ ħniena u fil-mirakli li għamel. Naraw ukoll xeni koroh tal-passjoni u l-mewt tiegħu fuq is-salib. L-aħħar ritratt f’dan l-album mhux tal-qabar, għax tlett ijiem wara qam rebbiegħ, u rritorna għand il-Missier.

Dawn il-ġrajjiet diġà seħħew, imma l-Iskrittura tiftħilna wkoll tieqa biex nittawlu fil-futur u turina kif Ġesù għad jerġa’ jiġi, mhux aktar fil-faqar, umiltà u oskurità, imma fil-glorja u bis-setgħa tas-Sultan tas-slaten. Dakinhar tarah kull għajn, kull irkoppa tmil quddiemu, u l-ħlejjaq kollha jistqarru li Ġesù Kristu hu l-Mulej. Meta jerġa’ jiġi l-Mulej se jagħmel ħaqq minn kulħadd, jikkundanna lill-ħżiena fl-infern, u jippremja u jieħu miegħu l-Ġenna lil dawk li jħobbuh u jafdaw fih.

X’parti se jkollna aħna fl-aħħar xeni tal-istorja? Is-sehem tagħna dakinhar jiddependi minn kif inwieġbu llum lill-Iben t’Alla. Lil dawk li jilqgħuh fl-ewwel avvent billi jafdaw ruħhom f’idejh u jimxu warah, Ġesù jilqagħhom fit-tieni miġja. Lil dawk li jistħu minnu llum, hu jistħi minnhom f’dak il-jum.

Id-dixxipli ta’ Kristu għandhom xewqa kbira li jaraw l-aħħar u l-isbaħ episodju tal-istorja tal-fidwa. Irridu naraw id-DVD tal-futur, għax aħna qed ‘nistennew dik it-tama mbierka, u d-dehra glorjuża t’Alla l-kbir, u s-Salvatur tagħna Ġesù Kristu’ (Titus 2:13).

Minn qalbi nixtieq lil kulħadd l-hena u s-sliem tal-Mulej.

Il-Ħidma t’Alla u l-Opri Tagħna

2011-10-25T05:29:00.001+02:00

Żgur li qatt ma nista’ niftaħar li ksibt is-salvazzjoni ta’ ruħi bil-ħila jew l-għemejjel tajba tiegħi. L-Iskrittura tfakkarna, ‘Intom salvi bil-grazzja, permezz tal-fidi; u dan mhux bis-saħħa tagħkom, imma b'don ta' Alla; mhux bl-opri, biex ħadd ma jiftaħar’ (Efesin 2:8, 9).

Xi ngħidu mela, li aħna l-Insara m’għandniex bżonn nagħmlu t-tajjeb ladarba m’aħniex salvi bl-opri? Jew forsi li nistgħu nibqgħu ngħix fid-dnub? Allaħares! Ideat bħal dawn huma ċ-ċaħda tal-evanġelju għax l-istess Skrittura tkompli tgħid, ‘Aħna ħolqien tiegħu, maħluqa fi Kristu Ġesù biex nagħmlu l-opri tajba li Alla ħejjielna minn qabel li għandna nagħmlu’ (vers 10).

Ħafna drabi l-iżball fil-reliġjon iseħħ meta issir enfasi fuq verità partikolari tant li tkun injorata jew miċħuda verità oħra. Din l-iskrittura tħarisna min ideat estremi dwar il-ħidma t’Alla u l-ħidma tagħna fis-salvazzjoni.

L-ewwelnett ninnotaw li s-salvazzjoni mhix bis-saħħa tagħna, ‘mhux bl-opri’. Alla mhux midjun ma’ ħadd. Ma jsalvaniex bi ħlas għall-għemejjel u l-isforzi tagħna, imma bi grazzja, b’favur li ma jistħoqqilniex. Dan hu wisq diffiċli nilqgħuh. Nippretendu li m’aħniex daqhekk ħżiena u nimmaġinaw li bi ftit għajnuna minn Alla kapaċi naslu. Imma l-iskrittura tifqalna l-bużżieqa tal-kburija tagħna. Mhux bis-saħħa tagħkom, jgħidilna Alla, mhux bl-opri biex ħadd ma jiftaħar!

Jekk għandna niftaħru ħalli niftaħru bil-Mulej għax is-salvazzjoni hi l-opra tiegħu. Dawk li huma salvi jistaqarru bil-ferħ li ‘aħna ħolqien tiegħu’. Is-salvazzjoni tal-midneb hi opra wisq akbar mill-ħolqien tal-univers, u din il-ħidma wettaqha Alla, mhux aħna, permezz ta’ Ibnu. Ġesu ħalla l-glorja tas-sema, sar bniedem, għix mingħajr l-iċken dnub, miet fuq is-salib, irxoxta u tela’ s-sema għall-fidwa tagħna. Mela s-salvazzjoni mhix il-ħidma tagħna l-bnedmin għax hi l-ħidma ta’ xi ħadd ieħor, Alla.

B’daqshekk ma jfissirx li wlied Alla huma qiegħda u bla xogħol. Alla jeħles l-ilsiera tad-dnub biex mill-qalb jaqdu lilu fil-ġustizzja u s-sewwa. L-ewwel il-Bibbja tgħid, ‘mhux bl-opri’, u immedjatament wara tkompli, ‘biex nagħmlu l-opri tajba’. Fi kliem ieħor, l-opri tajba m’humiex il-kawża imma l-frott tas-salvazzjoni.

Mela niżbalja jekk ngħid li nemmen fi Kristu waqt li nfittex nagħmel l-opri tajba biex nixtri l-Ġenna. Opri bħal dawn, avolja tajba fihom infushom, huma ċ-ċaħda tal-fidi. Bihom inkun ngħid lil Kristu, ‘Jien ma nafdakx biżżejjed; qed naħdem biex nimla fejn ħallejt nieqes int.’

Niżbalja wkoll jekk ngħid li nemmen fi Kristu waqt li ħajti hi xagħri spiritwali. In-nixfa u nuqqas ta’ opri jixhdu li l-fidi tiegħi hi mejta. Fidi bħal din ma twassal imkien ħlief għat-telfien.

Jeħtieġ mela nitlaq l-opri min idejja sabiex bil-fidi ngħannaq is-salib ta’ Kristu għall-maħfra u ħelsien, u minn hemm ‘il quddiem, b’idejn nodfa naħdem it-tajjeb f’ubbidjenza u bi gratitudni għall-imħabba tal-għaġeb tiegħu.

It-Talb Katina - Alla Mhux Magna tal-Bejgħ

2011-10-01T23:09:00.002+02:00

Fi żmien ġimgħa rċivejt tliet ittri b’talba fihom. Dawn ic-chain letters qabel kienu jintbagħtu bil-posta; illum jixterdu permezz tal-email b’ħafna aktar ħeffa. Ngħid is-sewwa qatt ma bgħatt kopji lil ħadd minkejja t-twissija li nitlef xi barka speċjali jew agħar, li tista’ tiġrili xi disgrazzja.

F’waħda minnhom hemm miktub biex ngħid Ave Marija u nitlob għal xi bżonn speċjali, u biex nistenna t-tweġiba fir-raba’ jum. Suppost nibgħatha lil 12-il persuna li jistħoqqilhom il-paċi, saħħa u prosperità. It-tieni ittra tinkludi talba qasira lil Alla l-Missier biex jeħlisni mill-inkwiet u jieħu ħsieb il-familja tiegħi. Twissini biex ma naqtax il-katina u biex ma nistaqsi xejn. Din ukoll kelli nibgħatha lil 12-il ruħ. L-aħħar waħda, talba lill-Ispirtu s-Santu, trid tingħad kuljum għal tlett ijiem, u twiegħdni li naqla dak li għandi bżonn fit-tielet jum.

It-talba fija nnifisha tista’ tkun tajba, u l-mottivi ta’ min jibgħathom jistgħu ikunu ġenwini wkoll. Lanqas m’hemm xejn ħażin li taqsam talba sabiħa mal-ħbieb tiegħek. (Wara kollox ħafna minna malajr jgħaddu ċajt baxx bl-email, imma mbagħad nibżgħu jew nistħu naqsmu xi ħsieb spiritwali li ma mmorrux noffendu lil xi ħadd).

Madanakollu dawn it-tip ta’ messaġġi b’wegħdi jew theddid fieragħ mhumiex espressjoni tal-fidi Kristjana. Huma twemmin superstizzjuż mingħajr ebda bażi fil-Kelma t’Alla.

Alla qatt ma wiegħdna li żgur iweġibna jekk nirrepetu talba partikolari u nibgħatuha lil ċertu numru ta’ nies. Dawn il-ħrejjef huma biss l-istħajjil ta’ min ivvinthom u ta’ dawk li minħabba l-biża’ jew għal xi raġuni oħra jkomplu jxerrduhom.

Xejn ma timpressjonani x-xhieda ta’ x’uħud li jgħidu li qalgħu grazzja skont kif kien hemm miktub fl-ittra. Ladarba tintbagħat lil eluf ta’ nies, hemm ċans tajjeb li xi wħud jinzertaw jolqtu l-likk. L-esperjenza tagħhom ma tibdel xejn mill-fatt li l-wegħda hi falza. Hemm minn jemmen li nagħla ta’ żiemel ukoll iġġib ‘good luck’ – u xi wħud minnhom ukoll kultant tiġihom tajba.

Mill-banda l-oħra l-wegħda hi mgiddba u miċħuda mill-eluf li għamlu eżattament l-istess ħaġa bħalhom u baqgħu b’xiber imnieħer. Ħafna Nsara b’kuxjenza sensittiva kellhom il-fidi tagħhom mheżża għax taw kas ta’ superstizzjonijiet bħal dawn.

It-talb mhux formola maġika. Lil Alla ma nistgħux nitrattawh qisu vending machine li minnha fil-pront jinżel il-flixkun tal-luminata meta nitfgħu l-munita u nagħfsu il-buttuna. Hekk inkunu nqisuh lil Alla jekk naħsbu li jismagħna għax nirrepetu talba speċifika u nwettqu xi kundizzjonijiet ivvintati mill-bniedem.

Lil Alla ma nistgħux nimmanipulawh jew inġarrbuh. Alla hu ħieles u jwieġeb talbna skont ir-rieda għarfa tiegħu. Il-Mulej għallimna nitolbuh, ‘Ikun dak li trid int.’ Fil-ġnien Ġesù stess talab lil Missieru, ‘Mhux kif irrid jien, iżda kif trid int.’

Alla jistedinna nersqu lejh b’qima, umiltà u fidi sinċiera. Hu jisma’ t-talb ta’ wliedu għax iħobbna, u mhux għax nużaw xi formola partikolari. Meta jogħġbu jisma’ talbna, għandna nirringrazzjaw mill-qalb. Jekk ma jweġibniex meta u kif iridu aħna, dan għaliex hu egħref minna u jaf x’inhu fl-aħjar interess tagħna.

Mamà, Xi Tfisser ‘Grace’?

2011-09-01T12:56:00.000+02:00

Filgħaxija wara li ddaħħal it-tifel fis-sodda u titlob miegħu, il-mara toqgħod tkantalu sakemm jorqod. (Meta rraqqdu jien, John ikun iridni ngħidlu storja fuq Fireman Sam imma qatt ma staqsieni biex inkantalu!)

Waħda mill-għanjiet favoriti hi l-ewwel strofa ta’ Amazing Grace.

Amazing grace, how sweet the sound
That saved a wretch like me.
I once was lost but now am found,
Was blind, but now I see.

Tista’ tgħid li tgħallimha bl-amment, imma din il-ġimgħa hekk kif bdiet tkanta, John waqqafha u staqsieha, ‘Mama, x’inhi grace’?

Aħna l-Insara sikwit insemmu l-grazzja t’Alla, u fil-qari tal-Iskrittura ta’ spiss niltaqgħu ma’ din il-kelma. Xi tfisser eżattament ‘grazzja’? L-Appostlu San Pawl jagħtina tixbiħa sempliċi u ċara.

‘Il-ħlas lil min jaħdem ma jingħaddlux bi pjaċir, imma b'dejn’ (Rumani 4:4). P.P. Saydon jittraduċi l-istess vers, ‘Min jaħdem, il-ħlas ma jingħaddlux bi grazzja, imma bħala dejn.’

Fl-aħħar tax-xahar l-imgħallem ma jgħidlix, ‘Ħa nagħmillek pjaċir u nagħtik u l-paga.’ Jien għandi dritt nitħallas għal ħidmieti, u l-imgħallem għandu d-dmir jagħtini dak li ħaqqni.

Mela grazzja tfisser il-kuntrarju tal-paga jew tal-ħlas mistħoqq għal xi biċċa xogħol. Grazzja hi favur, pjaċir, għotja b’xejn li ma ħdimtx u li m’għandix dritt għaliha.

Il-kunċett ta’ grazzja hu tant sabiħ u fl-istess ħin tant iebes biex nilqgħuh spiritwalment. Nifhmu kif Alla fil-ġudizzju jagħti lil uliedu ħlas għal għemilhom, imma insibuha aktar diffiċli nifhmu li l-istess Skrittura tgħallem li s-salvazzjoni hi grazzja, pjaċir, għotja b’xejn!

Sabiex żgur ma nitfixklux, il-Bibbja tinsisti kemm-il darba li s-salvazzjoni hi grazzja u mhux bl-opri tagħna (Efesin 2:8,9; Rumani 11:6, 2 Timotju 1:9).

Dan jitlob minna umiltà. Meta nfittxu ‘l Alla għas-salvazzjoni ta’ ruħna, ma nistgħux nersqu lejh bħallikieku ħaqqna xi ħaġa. Irridu mmorru għandu bħala tallaba u nappellawlu jgħinna skont il-ġenerożità tiegħu. Jeħtieġ nirrikorru għandu foqra u falluti biex jagħnina bil-ġid tiegħu. Irridu nammettu li aħna ħatja biex nitolbuh ħniena aktarx milli ġustizzja.

Imma kif taqbad tfisser verità hekk profonda lil tifel ta’ tlett snin? Għoġbitni l-ispjegazzjoni li tatu ommu.

‘John, inti taf kemm iħobbuk il-mamà u l-papà. X’nagħtuk meta tkun bravu?’

‘Present,’ weġibha.

‘Ġesù jħobbok ħafna iżjed mill-mamà u l-papà. Ġesù jagħtik present mhux għax kont bravu. Ġesù jagħtik present għax iħobbok ... għax iħobbok biss! Hekk tfisser grace.’

John wkoll għoġbitu l-ispjegazzjoni, u qal lil ommu, ‘Kanta, mamà, kanta!’

Aħna wkoll, meta nagħrfu l-imħabba tal-għaġeb t’Alla, li jogħġbu jsalvana bi pjaċir avolja m’aħniex denji, nibdew minn issa u ma nieqfu qatt inkantaw u nfaħħru l-glorja tal-grazzja tiegħu! L-għotja - il-present - t’Alla hi l-ħajja ta’ dejjem f’Ibnu Ġesù Kristu (Rumani 6:23).

L-Arti Sagra

2011-08-01T11:25:00.000+02:00

L-arti sagra taf tkun espressjoni sabiħa tal-fidi. Tista’ sservi wkoll bħala tfixkil spiritwali jekk tintuża ħażin.

L-Iskrittura ma tipprojbixxix il-pittura u l-istatwi. Infatti Alla stess ikkmanda lil Mosè jagħmel serpent tal-bronż u immaġni ta’ żewġ kerubini fuq l-arka. Tassew li l-kmandament jgħid, ‘La tagħmilx għalik suriet minquxa u ebda xbieha ta’ ebda ħaġa li hemm fl-għoli tas-sema, jew isfel fl-art, jew fil-baħar taħt l-art.’ L-Iskrittura tkompli tispjega l-użu ħażin tagħhom, ‘La tmilx quddiemhom, u la tadurahomx, għaliex jiena hu l-Mulej Alla tiegħek, Alla għajjur’ (Esodu 20:5, 6). Mela s-sens ta’ dan il-kmandament huwa li m’għandniex nagħmlu statwi biex immilu quddiemhom u nadaruawhom.

L-istatwi jsiru idoli meta jsiru oġġetti ta’ qima, jew meta ninsew li huma biss xbihat u nibdew inqisuhom b’mod superstizzjuż, bħallikieku l-istatwa għandha xi qawwa mirakoloża fiha nfisha. Bħalma raġel miżżewweġ bir-raġun jgħir għal martu jekk tibda tagħti wiċċ raġel ieħor, hekk Alla jiddispjaċih meta l-poplu tiegħu jagħti l-ġieħ li jistħoqqlu lill-ħlejjaq jew oġġetti bla ħajja.

L-istatwi u l-festi jafu wkoll isiru okkażjoni ta’ eċċess u tbaħrid, kif sfortunatament ġieli jiġri f’pajjiżna f’xi marċijiet. Rajna żgħażagħ nofshom mneżżgħin, bil-fliexken tal-birra f’idejhom, jagħjtu, jaqbżu u joffendu l-partitarji tal-każin l-ieħor. Dan paganiżmu.

Hemm perikli oħra li m’humiex daqshekk ovvji. Il-ħajja eżemplari tal-qaddisin tista’ tkun mudell għalina biex tressaqna lejn Kristu. Mill-banda l-oħra, ikunu ta’ xkiel jekk nagħmlu mill-qaddisin kompetituri għad-devozzjoni tagħna lejn il-Mulej.

Kristu għandu jkun l-ewwel f’kollox, kif nitgħallmu mill-attitudni umli ta’ ommu. Marija ftaħret fiċ-ċokon tagħha, il-qaddejja tal-Mulej, u l-ferħ tagħha kien li tfaħħar il-kobor tiegħu. Bl-istess mod, Ġwanni l-Battista feraħ meta n-nies bdew imorru għand Ġesù, għax kif qal, ‘Jeħtieġ jikber hu u niċkien jiena’ (Ġwanni 3:30). L-appostlu Pawlu ċanfar lill-Insara meta għamluh il-patrun tal-partit tagħhom. ‘Forsi Pawlu kien li ssallab għalikom,’ ċanfarhom, ‘jew f'isem Pawlu tgħammidtu?’ (1 Korintin 4:13).

Fl-aħħarnett ma rridux ninsew li l-pitturi u l-istatwi huma biss xbihat immaġinarji ta’ Kristu. Dak li naraw fil-pittura u l-iskultura sagra m’humiex xbihat veri u fidili tal-Imgħallem tagħna. Lil Kristu nagħrfuh fil-verità mill-Kotba Mqaddsa, li l-Ispirtu s-Santu juża biex ipinġi x-xbieha tiegħu fuq it-tila ta’ qalbna.

Matul il-pellegrinaġġ tagħna fuq din l-art aħna msejħin biex ngħixu bil-fidi u mhux bil-viżjoni. Fl-istess waqt nittamaw fil-jum imbierek meta niltaqgħu wiċċ imb wiċċ ma’ Kristu. ‘Lilu, għalkemm ma rajtuhx, intom tħobbuh; fih, għad li issa m’intomx tarawh, intom temmnu’ (1 Pietru 1:8). Dakinhar narawh kif tassew hu fis-sbuħija li thenni u tgħaxxaq l-qalb.

Jien Hu t-Triq

2011-07-01T12:23:00.002+02:00

Għalfejn qed ngħixu? X’inhu l-iskop u t-tifsira ta’ ħajjitna? Imħabbtin u aljenati b’ħafna ħwejjeġ, qajla nieqfu nirriflettu fuq din il-mistoqsija ewlenija.

Jew forsi nibżgħu naħsbu fuqha bis-serjetà għax il-ħajja hi frugħa jekk hi biss vjaġġ qasir sal-qabar.

Xi ħaġa fina tirribella kontra prospett bħal dan. F’qalbna hemm il-ħsieb tal-eternità. Ninġibdu lejn s-sabiħ u jogħġobna t-tajjeb, u nixtiequ nibqgħu ngawduhom għal dejjem. Ruħna tixxennaq għall-imħabba, u ma tixba’ qatt minnha.

Imma kif nistgħu nkunu nafu fiż-żgur? Forsi qed inħallu x-xewqat psikoloġiċi tagħna jqarrqu bina billi nivvintaw ħrejjef reliġjużi sbieħ biex nissodisfaw l-aspirazzjonijiet tagħna?

Għalina li nafdaw fil-Mulej Ġesù, it-tweġiba mhix ‘l bogħod. Ġesù qal fuqu nnifsu, “Jien hu t-Triq.” Din hi l-missjoni tiegħu, li jwassalna għad-destin li għalih konna maħluqin.

Qalilna ċar x’inhu dan l-iskop. “Jiena t-triq, u s-sewwa, u l-ħajja: ħadd ma jiġi għand il-Missier, ħlief bija.” Li mmorru għand il-Missier - dan hu l-għan tagħna - li nagħrfu ‘l Alla, induqu l-imħabba ħelwa tiegħu u nitgħaxxqu bis-sbuħija tiegħu.

Il-qalb umana ma ssibx serħan ħlief f’Alla. “Bħalma għażżiela mlebilba għall-ilma ġieri, hekk ruħi hi mlebilba għalik, o Alla” (Salm 42:1). Ħelwin u prezzjużi l-għotjiet tiegħu – il-ferħ u l-għożża tal-familja, il-ħbieb, l-ikel, is-saħħa u l-ħolqien meraviljuż – imma wisq oħla hu Alla nnifsu; xejn u ħadd ma jista’ jikkompeti miegħu. “Min għandi fis-sema ħliefek? U m’hemm ħadd fl-art li nixtiequ ħliefek” (Salm 73:25).

Għaliex Ġesù jinsisti li hu biss it-triq, li ħadd ma jiġi għand il-Missier ħlief bih? Dan il-kliem ma jdoqqx f’widnejn is-soċjetà moderna. Ċertu wieħed ħassieb, Ramakrishna Paramahamsa, jesprimi l-idea popolari li bħalma wieħed jista’ jitla’ fuq il-bejt ta’ dar permezz ta’ sellum, qasba, taraġ jew ħabel, hekk diversi huma t-toroq u l-mezzi biex tilħaq ‘l Alla, u kull reliġjon turi waħda minn dawn il-mezzi.

Ramakrishna forsi jirnexxielu jitla’ fuq il-bejt bil-ħabel. Hemm fuq jiltaqa’ ma’ reliġjuzi oħra li jaħsbuha bħalu, iżda m’Alla jiltaqa’? Alla ma jgħammarx fuq il-bejt, iżda fl-ogħla smewwiet, fid-dawl li ħadd ma jista’ jersaq lejh. Pont wieħed ilaħħaq id-distanza infinita bejn il-ħlejqa u l-ħallieq, bejn il-midneb u Alla. Dan il-pont hu Ġesù Kristu

It-Triq hi Ġesù għax hu r-rivelazzjoni perfetta t’Alla, hu x-xbieha t’Alla li ma jidhirx. It-Triq hi Ġesù għax ta lilu nnifsu għalina fuq is-salib, biex inaddafna minn dnubietna u jagħmilna denji biex nersqu fid-dawl tal-glorja tal-Missier.

Ħabib, għaraf lilek innifsek. Għaraf l-iskop veru li għalih kont maħluq, u tibdlu ma xejn. Isma’ l-istedina ta’ Kristu. Hu jnaddfek minn kull ħażen u jħabbek m’Alla l-Missier. Tipprovax tissodisfa ruħek b’dak li ma jxebbax. Int maħluq għal Alla; permezz ta’ Kristu inti ssib il-milja ta’ ruħek fih.

Rabta bl-Ilsien

2011-06-01T22:49:00.000+02:00

Id-diskussjoni estensiva fuq id-divorzju serviet, jekk xejn, biex naħsbu aktar fuq dawk fostna li qed ibatu minħabba li ż-żwieġ tagħhom falla. Għal dawk li huma hienja, kien żmien ta’ riflessjoni fuq kemm hija prezzjuża u fraġli r-rabta tal-imħabba bejniethom.

Il-ftit snin li ili miżżewweġ kienu l-isbaħ żmien ta’ ħajti, u nittama li l-futur ikun aħjar. M’għandi ebda delużjoni li bilfors kollox jibqa’ miexi ward u żahar. Għall-kuntrarju naf li marti u jien se niffaċċjaw aktar provi u tiġrib akbar milli kellna s’issa. Naf ukoll li aħna suġġetti għall-iżball u d-dgħjufija bħal koppji oħra li qatt ma kienu jobsru li jistgħu jinfirdu, iżda llum ma jistgħux jaraw lil xulxin pinġuti.

Ftakart ukoll fi tfuliti u fil-mudell taż-żwieġ li wrewni l-ġenituri tiegħi. Missieri ma kienx ta’ skola u ma jidhirlix li attenda wisq seminars fuq id-dinamika taż-żwieġ. Kien jgħid biss li “ż-żwieġ hu rabta bl-ilsien li ma tinħallx bis-snien!”

Missieri kien jibża’ minn Alla. Għex għal aktar minn ħamsin sena m’ommi biex iwettaq il-wegħda li kien għamlilha dakinhar tat-tieġ, li jkun fidil lejha fir-risq it-tajjeb u l-ħażin, fis-saħħa u fil-mard, u li jħobbha u jirrispettaha tul ħajtu kollha.

Kellhom il-problemi tagħhom imma bħala soluzzjoni ma kienx jgħaddilhom minn moħħhom li jaqbdu ħwejjiġhom u jitilqu għal rashom. Tgħallmu jirranġaw kull differenza bejniethom, jieħdu paċenzja b’xulxin, u jaħdmu bla heda għall-familja. Għalkemm dgħajjef u għajjien, Missieri baqa’ sal-aħħar jieħu ħsieb ta’ martu sakemm il-Mulej ħadu miegħu.

Irrid li bħal missieri ngħix fil-biża t’Allu, b’rispett u ubbidjenza lejh. Wara kollox iż-żwieġ waqqfu Alla għall-ġid tagħna. Jienu u marti neħtieġu l-għerf u l-grazzja tiegħu biex ingawduh u inħarsuh għal għomorna.

Għalhekk ma rridx inqiegħed ’l uliedi, li nħobbhom aktar minn dawl għajnejja, qabel marti. Wisq anqas nista’ nagħti aktar importanza lill-karriera minnha. Lanqas nista’ nagħti wiċċ lil xi mara oħra. Nemmen li kien Alla li waħħadna f’ġisem wieħed, u għalhekk ir-rabta tagħna għandha tiġi qabel kull relazzjoni oħra u kwalunkwe interess ieħor. Wara Alla, marti tiġi l-ewwel.

Irrid niddedika ruħi għal marti, nirrispettaha u naqdiha għax Alla tani lil Joanne biex inħobbha bħalma Kristu jħobb lil knisja. Anke meta l-knisja tkun indenja u ingrata, Kristu jħobbha u ta ħajtu biex jagħtiha l-ħelsien u l-ħajja.

Fil-passi tal-Imgħallem, ma nistax naħrab mit-tbatija u s-sagrifiċċju fl-impenn u d-dedikazzjoni tiegħi għal marti. Lanqas m’għandha tkun ħaġa tqila li nissapporti, nieħu paċenzja u naħfrilha l-ftit nuqqasijiet tagħha meta nitfakar li Kristu jaħfirli u jilqagħni minkejja l-ħafna stupitaġnijiet u dnubiet tiegħi.

Jien u marti ma nafux x’hemm lest għalina fil-futur, imma nafu lil Dak li iżomm f’idejh ir-riedni ta’ ħajjitna, u li jista’ wkoll iseddaq ir-rabta bl-ilsien li għamilna quddiemu. Nibqgħu flimkien jekk nibqgħu qrib tiegħu.

Fil-Għadab Ftakar fil-Ħniena

2011-05-01T01:40:00.001+02:00

Meta kont żgħir kont pittma għall-ikel. Illum niekol kollox (minbarra l-kirxa), u nixxennaq għal platt minestra bil-ġbejniet friski kif kienet taf tagħmel ommi.

Fir-reliġjon nafu nkunu pittma wkoll. Nagħżlu dak li jogħġobna u nwarrbu dak li ma jdoqqx għal widnejna. Pjaċevoli l-idea li Alla huwa mħabba, imma nitqarrsu jekk xi ħadd isemmi l-għadab t’Alla. Ir-rabja u Alla ma jmorrux flimkien, għallanqas dak ‘alla’ immaġinarju li bħall-idoli tal-qedem naqqaxna, mhux bl-iskalpell fil-ġebel, imma fi ħsibijietna. Madankollu Alla li naqraw fuqu fil-Ktieb, kif wera lilu nnifsu, hu Alla li jħobb u jirrabja wkoll.

Meta nirrabjaw aħna sikwit nitilfu l-kontroll u niżbaljaw – taqbżilna u wara jiddispjaċina għal dak li nkunu għidna u għamilna. Mhux hekk il-korla t’Alla. Ir-rabja tiegħu hi ġusta, qaddisa u f’waqtha.

Kif tista’ r-rabja tkun ġusta?

Liema omm ma ssirx tigra jekk taqbad lil xi ħadd jabbuża minn uliedha? Ikollok raġun tisħon jekk xi ħadd jisirqek jew jaqla’ l-malafami fuqek? Jew jekk drug pusher, li għal qligħ moqżież jeqred bla skruplu l-ħajja ta’ tant żagħżagħ, jinqabad, imma joħroġ liberat mill-qorti - tirrabja? Ikollok raġun? Trid tkun bla demm biex tibqa’ ċass quddiem l-inġustizzja u l-krudeltà.

Mela kif taħseb li jħossu Alla – hu li jħobb il-ġustizzja ferm aktar minna u li jrid biss il-ġid lill-ħlejjaq tiegħu – meta minflok nirringrazzjawh u nobduh mill-qalb, ninjorawh, nidgħu b’ismu u nisfidawh? Għandu raġun jirrabja? Infatti Alla, ladarba hu perfettament ġust, bilfors jopponi l-ħażen u jikkastiga d-dnub.

L-Iskrittura twissina li minn issa l-korla t’Alla tidher kontra l-ħażen tagħna lkoll. Madankollu dan hu żmien ta’ grazzja u sabar li fih Alla qed isejħilna biex induru lejh. Twissina wkoll li dawk li jwebbsu rashom qed jiġimgħu għalihom korla għal jum il-korla (Rum 1:18; 2:5, 6). Għad ikun Kristu li ‘jisħaq l-inbid ibaqbaq fil-magħsra tal-korla t’Alla li jista’ kollox’ (Riv 19:15).

Mhux ta’ b’xejn li l-profeta jappella lill-Mulej, ‘Fil-għadab ftakar fil-ħniena!’ (Ħab:3:3).

L-istess Kristu huwa l-uniku protezzjoni u ħelsien mill-għadab ġust t’Alla kontrina l-midinbin. Dawk li tassew jemmnu fih huma ġustifikati b’demmu u għalhekk jistgħu ikunu kunfidenti li se jsalvaw mill-korla ta' Alla permezz tiegħu (Rum 5:9). Dawk mela li jafdaw fih u jimxu miegħu jistgħu jħarsu ‘l quddiem b’kunfidenza għax jafu li ‘Alla ma għażilniex għall-għadab, imma biex niksbu s-salvazzjoni permezz ta’ Sidna Ġesù Kristu’ (1 Tess 5:9).

Kuruna tax-Xewk

2011-04-01T01:05:00.004+02:00

‘Ġesù tiegħi rasek l-għażiża; Min niggiżlek b’dak ix-xewk?’ Kont għadni daqsxejn ta’ tfajjel meta smajt għall-ewwel darba din il-mistoqsija profonda. Kont ma’ ommi, niftakar, fil-purċissjoni tal-Ġimgħa l-Kbira tax-Xagħra, Għawdex. Il-mużika funebri flimkien mal-ħsieb li jien kelli ħtija għat-tbatija u l-passjoni ta’ Ġesù mlew qalbi bi dwejjaq kbar.

Kienu ’l ħafna dnubiet tiegħi
Ġesù twajjeb, aħfer u ħenn.

Erbgħin sena wara, il-kontemplazzjoni tas-salib ta’ Kristu għadu jnissel fija sens ta’ ħtija u mistħija. Jekk xejn illum nifhem aktar kemm offendejtu bi dnubiet kotrana; iva, kont jien ukoll li nsiġt u libbistlu kuruna tax-xewk.

Imma l-Kalvarju m’għandux ikun post ta’ indiema u biki biss. Is-salib mhux il-kundanna tal-midneb, imma l-ħelsien tiegħu. Filwaqt li d-dnubiet tiegħi wasslu għall-mewt ta’ Kristu, il-mewt tiegħu kienet għalija l-għajn ta’ ħajja. Bħaż-żerriegħa li tinxteħet fl-art u tmut biex minnha tinbet u tikber xitla ġdida, hekk hi l-mewt tal-Messija għalija.

Kristu ma mietx b’aċċident; miet skond il-pjan etern t’Alla biex jikseb il-fidwa tal-poplu tiegħu. Lanqas ma miet intortament jew inġustament. Nibża’ nikteb hekk fuq Ġesù, il-qaddis t’Alla, li twieled u għix mingħajr qatt ma għamel l-iċken dnub, u li dejjem u f’kollox obda l-Missier. Imma jibqa’ l-fatt li hu li kien bla dnub, ma kienx mingħajr dnub fuq is-salib.

Id-dnub li ġarr fuq is-salib ma kienx tiegħu. Il-profeta jitkellem f’isem il-poplu t’Alla u jgħid li ‘l-Mulej xeħet fuqu l-ħażen tagħna lkoll’, u jerġa’, ‘il-ħażen tagħhom jitgħabba bih hu.’ (Ara Isaija 53). Dak kien id-dnub li minħabba fih Kristu miet! ‘Ħu kien miġruħ minħabba fi dnubietna, misħuq minħabba fi ħżunitna.’ Bir-raġun mela li l-poeta jwaħħal fija għat-tbatija ta’ Ġesù - kienu ‘l ħafna dnubiet tiegħi li niggżu bix-xewk ir-ras għażiża tiegħu.

F’dan id-dlam ifiġġ id-dawl jiddi tas-sema. Minħabba li Kristu tgħabba bid-dnubiet tiegħi, jien ħlist mill-ħtija li altrimenti kienet tkun għalija it-telfien għal dejjem. It-toqol li kien fuq spallti, ħaduli u ħelisni minnu. Hu ħa l-kastig li kien jixraq lili. Hu ‘neħħa l-ħtijiet tal-kotra, u ndaħal għall-midinbin.’ Neħħa l-ħtija tiegħi ukoll! Jien ħieles!

Għalhekk is-salib ma jnissilx f’qalbi biki u dulur biss, imma jġegħlni nkanta u naqbeż bil-ferħ. Ix-xewk li niggeż ir-ras ta’ Kristu, lili kisibli l-kuruna tal-ħajja. Is-salib li fuqu ċarċar demmu s-Salvatur, għalija sar l-pont li jwassal sas-sema.

Meta nitolbu, ‘Ġesù twajjeb, aħfer u ħenn,’ naf żgur li jismagħni. Alla jista’ jaħfirli għax Kristu tgħabba bi dnubieti. Ix-xewk, l-agunija u l-mewt tal-Iben huma r-raġuni għaliex Alla ġustament jista’ jeħlisni mill-ħtija u l-kastig. Għalhekk is-salib huwa l-monument tal-ħniena t’Alla. Minħabba fih iħenn għalija; minħabba s-salib Alla jaħfirli!

Alla Hekk Ħabb id-Dinja

2011-03-01T20:54:00.004+01:00

L-ewwel ktieb li xtrajt lit-tifel tiegħi kien jismu, ‘Most of all Jesus loves you’. Kont naqralu minnu anke qabel twieled. Il-ktieb kollu stampi jirrakkonta storja sempliċi: Il-mama u l-papa jħobbuk; in-nanniet u z-zijiet iħobbuk, il-ħbieb iħobbuk … imma aktar minn kollox, Ġesù jħobbok! Issa li qed jikber u jifhem ftit aktar, qabel jorqod it-tifel tgħallem jitlob, ‘Grazzi Ġesù talli tħobbni.’ M’hemmx lezzjoni aktar importanti x’jitgħallem u jgħożż!

Għax Alla hekk ħabb id-dinja, li ta l-Iben waħdieni tiegħu, biex kull min jemmen bih ma jintilifx, iżda jkollu l-ħajja ta’ dejjem (Ġwanni 3:16).

Kemm huma sbieħ dawn il-kelmiet: ‘Alla hekk ħabb id-dinja’! Minkejja li d-dinja ħaditha kontra l-Ħallieq, Alla xorta waħda jħobbha. Mhux għax aħna ħelwin, imma għaliex hu twajjeb u ħanin. Mhux għax aħna mingħajr dnub, imma minkejja l-ħażen tagħna, Alla jħobb lid-dinja!

Alla jħobbna għax ħalaqna, jagħtina l-ħajja, iżommna ħajjin, jieħu ħsiebna u jipprovdielna għall-bżonnijiet tagħna. Dawn l-għotjiet napprezzawhom aktar meta joftomna minnhom imqar għal ftit żmien. Imma l-manifestazzjoni ewlenija tal-imħabba t’Alla tidher fl-akbar għotja li ta, u li qatt jista’ jagħtina. ‘Alla hekk ħabb lid-dinja li ta l-Iben il-waħdieni tiegħu.’ Imħabba akbar minn hekk ma tistax tkun. Meta tana lil Ibnu, Alla tana qalbu.

Alla tana lil Ibnu meta bagħtu fid-dinja bħala bniedem, umli u ġwejjed, biex jgħix fostna, jgħallimna u finalment biex imut għalina. Tah ġisem tad-demm u l-laħam biex ikun imsammar mal-għuda u biex demmu jixxerred għall-fidwa tagħna. Alla l-Missier wera imħabba infinita meta nifed qalb Ibnu bis-sejf tal-ġustizzja. Hu li kien bla dnub ħa l-kastig li kien ħaqqna aħna, u miet darba għal dejjem bit-tpattija għad-dnubiet tal-poplu tiegħu.

Alla għadu sal-lum jagħti lil Ibnu fil-wegħda tal-evanġelju. Kien bi skop li l-Missier wasslu sas-salib u ħarġu rebbiegħ mill-qabar, biex ‘kull min jemmen fih ma jintilifx iżda jkollu l-ħajja ta’ dejjem’.
Quddiemna hemm l-għażla bejn il-ħajja u l-mewt. Ninsabu fil-periklu tat-telfien għax ilkoll dnibna kontra l-ħallieq u ħaqqna l-kundanna tiegħu fl-infern kif wissiena kemm-il darba Kristu.

Imma nirringrazzjaw ‘l Alla, l-Iskrittura tħabbrilna l-Bxara t-Tajba ta’ salvazzjoni. Ġesù ma ġiex biex jikkundanna d-dinja imma biex isalvaha. ‘Kull min jemmen fih ma jintilifx’. Alla jaħfer u jilqa’ lil dawk kollha li jemmnu f’Ibnu u jintelqu f’dirgħajh. Minflok it-telfien, Alla jagħtina b’xejn il-ħajja ta’ dejjem li kiseb Ġesù bil-mewt u l-qawmien tiegħu. Biss irridu nafdaw fih!

X-Ray ta' Ruħna

2011-02-03T11:57:00.003+01:00

Jinżlulna għasel il-kumplimenti u t-tifħir, imma l-kritika xxerraqna. Mill-ewwel noqomsu, naqgħu fuq id-difiża u nieħdu għalina. Madankollu, bħal mediċina morra li kienet tagħtini ommi meta kont żgħir, il-kritika taf tkun aktar bżonjuża mid-dlik bix-xemgħa. Speċjalment jekk tkun ġejja mill-Imgħallem tagħna Ġesù.

Meta l-Mulej iqiegħed sebgħu fuq il-ferita, xorta waħda nweġġgħu, imma nistgħu nserrħu moħħna li l-kritika tiegħu hi vera u ġusta, u li l-mottiv u l-għan tiegħu huwa għall-ġid tagħna. Darba minnhom, waqt li kien qed jgħallem fuq it-talb, Ġesù qal hekk: “Mela jekk intom, nies ħżiena bħalkom, tafu tagħtu lil uliedkom ħwejjeġ tajba, kemm aktar Missierkom li hu fis-smewwiet jagħti ħwejjeġ tajba lil min jitlobhomlu?”

Innottajt x’sejħilna? Bla tlaqliq xejn, Ġesù jgħid li aħna ħżiena. Ħżiena!

Forsi tgħidli li mhux qed jgħid għal kulħadd, li ma tistax tiġġeneralizza, li filwaqt li hawn nies ħżiena, hawn ħafna nies tajbin ukoll, li ma tistax tkun daqshekk negattiv!

Huwa interessanti li Ġesù ma kienx jitkellem fuq il-giddieba, il-ħallelin u l-qattiela, imma lid-dixxipli tiegħu, lil dawk li jseħħu lil Alla missierhom. Skond Ġesù, imqar ulied Alla, sakemm jibqgħu f’din id-dinja, huma wkoll ħżiena.

Kieku Kristu qal, ‘Intom ħżiena jekk tagħmlu l-ħażen,’ konna nifhmuh u naqblu miegħu mill-ewwel. Imma ma qalx hekk. Għal kuntrarju, Kristu qal li aħna xorta waħda ħżiena minkejja it-tajjeb li nagħmlu. Wara kollox, il-giddieb sikwit jgħid il-verità, il-ħalliel kapaċi wkoll ikun ġeneruż, u l-qattiel jaf, fejn irid, ikun ħanin. Hekk ukoll, id-dixxipli tiegħu jagħmlu ħafna ġid -- il-ġenituri jonfqu u jintefqu għall-ġid ta’ wliedhom -- madankollu, minkejja t-tajjeb li nagħmlu, Ġesù jiddikjara li aħna ħżiena.

Iebsa din biex inniżżluha! Imma inkunu boloh jekk ma neħduhx bis-serjetà. Hu li jaf il-qalb umana jagħtina dijanjosi korretta, għalkemm xejn sabiħa, tal-kundizzjoni ta’ ruħna. Jien konvint li xi wħud ma jduqux il-ħniena u l-maħfra t’Alla għax qatt ma kienu onesti u umli biżżejjed biex jammettu li huma ħżiena. X’tagħmel jekk it-tabib jgħidlek li għandek marda serja? Tgħidlu ma jkunx negattiv? Tinjorah? Tgiddbu? Jew tgħidlu, ‘Dott, x’nistgħu nagħmlu biex infieq?’

Kristu jwissina bil-qagħda ħażina tagħna għal skop tajjeb. Mhux biex niddispraw jew naqtgħu qalbna, imma biex infittxu lilu. Hu ma ġiex għal min hu b’saħħtu, imma għall-marid; mhux għat-tajbin, imma għall-ħżiena. Meta nersqu lejh, imtaqqlin kif aħna bid-dnubiet u l-ħtija, insibu fih il-maħfra u l-għajnuna biex jibdilna fuq xbieha qaddisa tiegħu.

Ħajja bis-Sens

2011-01-01T01:00:00.004+01:00

Ifirħu ma’ min jifraħ, tgħidilna l-Iskrittura, u ibku ma’ min jibki. Mhux l-ewwel darba li jkolli nagħmel it-tnejn fl-istess jum. Issa nifraħ mal-ġenituri fit-twelid tal-ewwel tarbija tagħhom, u ftit wara nibki ma’ ġenituri oħrajn għat-telfa ta’ binhom.

Din il-ġimgħa iċċelebrajna l-birthday tat-tifel, John, imma jiena u l-mara kellna nsibu ħin ukoll biex nattendu l-funeral ta’ teenager li tilef il-glieda twila kontra l-leukaemia. Dakinhar kilna, xrobna, dħakna ... u bkejna ukoll.

Tgħallimt mill-esperjenza nifraħ u niddejjaq fl-istess jum. Il-ħajja hi taħlita tat-tnejn, tas-sabih u l-ikraħ, ta’ żfin u luttu, ta’ ħelu u morr. Ma nistgħux nistennew sakemm kollox ikun sew qabel nitbissmu. Ikun kollu għalxejn, għax f’din id-dinja qatt mhu se jkun ‘kollox’ tajjeb.

Mill-banda l-oħra fl-għawġ u t-tbatija m’għandniex naqtgħu qalbna għax anke fis-siegħa l-aktar mudlana, ifiġġ raġġ ta’ dawl. Aħseb fuq Ġesù. X’qawwih waqt il-passjoni? L-Iskrittura tgħidilna li kien minħabba l-ferħ imqiegħed quddiemu li Ġesu sofra s-salib. Il-ferħ ma kienx il-bogħod anke fl-agunija!

Hekk hi l-ħajja. Bħal Ġob irridu nitgħallmu nilqgħu mingħand il-Mulej sew it-tajjeb kif ukoll il-ħażin. Mhux faċli, imma żgur mhux impossibbli jekk f’kull okkazzjoni nżommu ‘l Alla quddiem għajnejna. Fil-ferħ nirringrazzjawh mill-qalb għall-għotjiet tajba tiegħu, waqt li fin-niket, nafdawh u nżommu aktar sod miegħu. Bħalma jgħid Ġakbu, Hemm xi ħadd minkom li jsofri? Ħa jitlob. Hemm xi ħadd ferħan? Ħa jgħanni s-salmi.

Fejn hemm Alla, il-ferħ hu aktar ferrieħi; filwaqt li n-niket u t-tbatija ma jibqgħux daqshekk tqal għax ma ġġorrhomx waħdek. Imma mingħajr Alla, il-ferħ hu frugħa ta’ mument, u n-niket iwassal għad-disprament.

Din mela hi t-talba tiegħi għall-qarrejja ta’ din l-ittra, li matul is-sena li ġejja nitgħallmu nimxu ‘coram Deum’ – konxji tal-preżenza t’Alla magħna. Teħodna fejn trid l-id moħbija tal-providenza, fil-mergħat iħaddru jew fil-wied ta’ dell il-mewt, basta ma nkunux weħidna.

Dik ħajja ta’ min jgħixha; dik hi l-unika ħajja li tagħmel sens.

Il-Milied u l-Materjaliżmu

2010-12-01T05:27:00.000+01:00

M’għandix f’moħħi r-rigali, ix-xalar u l-alkoħol, jew kif dawn il-ħwejjeġ joħonqu t-tifsira reliġjuża tal-Milied. Qed naħseb fuq l-filosofija tal-ħajja tal-ġenerazzjoni żagħżugħa.

Ħafna żgħażagħ Maltin ma jemmnux, jew aħjar ma jimporthomx, mit-twelid ta’ Ġesù jew kif din it-tarbija twieldet minn mara verġni. Għal ħafna minnhom il-grajja tal-Milied, bħal Santa Klaws, huma ħrejjef tat-tfal. Ma tagħtihomx tort sa l-aħħar. Trabbew f’soċjetà li aktar ma jmur aktar qiegħda issir materjalista. Għalihom ir-realtà tikkonsisti mill-ħwejjeġ li jaraw b’għajnejhom u jħossu b’idejnhom, u daqshekk. Il-valuri tagħhom huma biss il-flus, il-karozza u d-divertiment.

Il-kanzunetta ‘I’m a material girl, and I live in a material world’ tiġbor fil-qosor l-attitudni tagħhom għall-ħajja. Jien materjali u ngħix f’kuntest materjali. Dak kollox. M’hemm xejn iżjed. Il-ħajja hi vjaġġ qasir minn Mater Dei sal-Addolorata. Imbagħad addio kollox.

Iż-żagħżugħ modern jixbaħ għasfur li trabba ġo gaġġa. Għandu l-istint li jtir iżda meta tħajjar iferfer ġwinħajh tqatta’ mal-fidiferru u nstelaħ. Id-dinja tiegħu hi limitata b’konfini tal-metall. L-ispazju tiegħu huwa pied kwadru. Ma jafx xi jfisser il-libertà ta’ sema miftuħ. Ma jafx xi jfissru s-siġar, l-għoljiet, is-sħab, ir-riħ u x-xemx,u peress li ma jesperjenzax din ir-realtà, jassumi li ma teżistix.

Lanqas biss jikkonsidra l-possilità ta’ realtà spiritwali lil hemm mill-fiżiku. Qatt ma ħareġ minn dik il-gaġġa u għax fl-għeluq ta’ ħajtu ma jsibx ’l Alla, konvint li la hemm Alla u lanqas xejn għajr il-fiżiku. Għalhekk ma jemminx fit-twelid verġni ta’ Ġesù għax ma jemminx f’Alla li jista’ jwettaq miraklu bħal dak.

X’jiċċellebraw fil-Milied iż-żgħażagħ Maltin? It-twelid tal-Feddej, il-miġja tal-Iben t’Alla fid-dinja? Le! X’jiċċelebraw mela? It-twelid naturali ta’ tarbija mal-eluf oħra li jitwieldu kuljum? Forsi t-twelid ta’ tarbija illeġittima? Ħrafa qadima? Lanqas! Il-Milied hu skuża oħra biex jagħmlu party u jieħdu ftit pjaċir - għax ħlief materjaliżmu ma jafux!

Ġesù jikkontradixxi l-filosofija materjalista u jfarrak il-premessa ewlenija tal-ħajja moderna. Ir-realtà hi wisq aktar minn dak li naraw. Ġesù hu l-aqwa xhieda ta’ dan. Dak li sar bħall-ħlejjaq, huwa l-Ħallieq. Dak li daħal fl-isfera taż-żmien, hu etern. Dak il-bnieem tad-demm u l-laħam bħalna, hu Alla!

Ġesù joffri alternattiva għad-disperazzjoni tal-ħajja moderna. Ifejjaq il-ġwienaħ miksurin bid-dnub u jiftaħ beraħ il-gaġġa biex intiru u nogħlew ’l fuq lejn is-smewwiet u ngawdu ix-xirka u l-imħabba ħelwa t’Alla.

Il-prezz? Gratis! Kristu jagħti b’xejn il-maħfra u l-ħajja lil dawk li jilqgħuh bil-fidi. Il-fidi tixbaħ l-id li tirċievi riġal mingħand ħabib. Imma biex nilqgħu dan il-rigal ta’ Kristu jeħtieġ nitilqu minn idejna l-materjaliżmu li s’issa tant għożżejna.

Ftaħir jew Fiduċja

2010-11-01T09:00:00.000+01:00

Hemm periklu li tkun reliġjuż. Huwa sewwa li tgħix tajjeb, titlob u tmur il-knisja, imma huwa ħażin meta tibda taħseb li int xi ħaġa u tara lil oħrajn dubbien.

Darba Ġesù qal parabbola lil “x’uħud li kienu jafdaw fihom infushom li huma nies sewwa u kienu jżebilħu l-oħrajn” (Luqa 18:9-14). Mela żewġt irġiel telgħu fit-tempju jitolbu. Wieħed kien Fariżew, meqjus minn kulħadd bħala raġel tar-ruħ u li jimxi skond il-liġi; l-ieħor, il-publikan, ma tantx kellu fama tajba.

Il-Fariżew qagħad bil-wieqfa jitlob fih innifsu, “O Alla niżżikħajr li miniex bħan-nies l-oħra, ħattafin, bla ħaqq, adulteri, jew ukoll bħal dan il-publikan. Insum darbtejn fil-ġimgħa u nagħti l-għexur ta’ kulma għandi.” Qagħad jiftaħar quddiem Alla bil-CV reliġjuż u morali tiegħu.
L-ieħor, miskin, ma tantx kellu kwalifiki! Waqaf il-bogħod u ma riedx biss jerfa’ għajnejn lejn is-sema. Talab biss, “O Alla, kun ħanin miegħi midneb.”

Ma liema wieħed minn dawn it-tnejn tqabbel lilek innifsek? Forsi wieħed jirrispondi, “Jien ngħix ħajja tajba u nagħmel milli nista’ biex nogħġob ‘l Alla. Imma jien m’inix Farizew għax jien nemmen li bl-għajnuna u l-grazzja t’Alla jien sirt bniedem ġust.” Madankollu hekk ukoll kien jaħseb il-Fariżew. Ma qalx li wasal fejn wasal bil-ħila personali tiegħu, imma rringrazzja ‘l Alla għas-suċċessi u t-tjieba li kiseb. Bi ftit umiltà ipprova jgħatti l-kburija ta’ qalbu.

U l-kburija ma ħallitux jara lilu nnifsu kif tassew kien, midneb! Qabbel lilu nnifsu ma nies agħar minnu biex jidher u jħossu tajjeb. Kien messu ħares lejn Alla fil-glorja u l-qdusija tiegħu li quddiemu anke l-anġli jgħattu wiċċhom. M’hemm ħadd tajjeb, qal f’post ieħor Ġesù, ħlief wieħed, Alla. Forsi għalhekk qal ukoll x’imkien ieħor li l-prostituti u l-publikani jidħlu qabel l-fariżej fis-saltna tas-smewwiet. Ħadd minnhom ma ħaqqu jidħol, imma tal-ewwel għandhom ċans akbar jammettu li huma midinbin u jduru lejn Alla.

Kif għamel il-publikan fil-parabbola. Ikollok ħniena, talbu. Fi kliem ieħor, tagħtinix dak li jistħoqqli. Nammetti li jien midneb, li ħaqqni il-kundanna u l-kastig għal għemili. Ikollok ħniena minni, midneb. Ma nista’ noffrilek xejn għajr il-ħazen u l-ħtija tiegħi, u għalhekk nappella biss għat-tjieba tiegħek. Kliemu kienu ftit, imma qalbu kienet niedma u umli, u Alla sema’ l-għajta tiegħu.

Dawn mela huma ż-żewġ alternattivi. Li nippretendu li aħna sewwa m’Alla għax nistinkaw biex ngħixu ħajja tajba, jew, ma nippretendu xejn għajr li aħna bla fejda, u nappellaw biss għall-ħniena ħelwa t’Alla. Dan jgħodd għal kulħadd, speċjalment għal dawk fostna li huma l-aktar reliġjuzi. Aħna wkoll jeħtieġ li numiljaw ruħna, nagħrfu li aħna wkoll midinbin, u nafdaw f’Alla, u xejn fina nfusna.

Ġesù spiċċa billi qal, “Ngħidilkom dar-raġel niżel daru ġġustifikat aktarx milli l-ieħor; għax kull min jitgħolla jitniżżel; u kull min iċekken lilu nnifsu jitgħolla.” Il-publikan kien iġġustifikat, meqjus minn Alla bħala ġust, filwaqt li l-ieħor, li kien iqis lilu nnifsu bħala raġel sewwa, kien meqjus minn Alla li ma kienx! Allaħares nistennew sal-ġudizzju tal-aħħar biex nispokru dan l-iżball fatali.

L-Iben t’Alla

2010-10-01T10:01:00.000+02:00

Filwaqt li dejjem għandu jkollna rispett u mħabba lejn nies ta’ twemmin ieħor, huwa dmirna l-Insara li ngħollu l-Isem tal-Imgħallem tagħna ‘l fuq minn kulħadd. Meta staqsa x’jaħsbu fuqu, Ġesù ma kienx sodisfatt li n-nies kienu jqisuh bħala wieħed mill-profeti. Lid-dixxipli tiegħu staqsihom x’kienu jaħsbu huma, u kien hawnhekk li Pietru għamel dik l-istqarrija kbira, ‘Inti l-Kristu, Bin Alla l-ħaj.’

Ġesù hu l-Iben t’Alla, u allura hu Persuna distinta mill-Missier u sottomess lejh. Dan ma jfissirx li l-Iben għandu natura differenti mill-Missier. It-tifel tiegħi hu sottomess għalija, missieru; madanakollu, ibni huwa uman bħali u daqsi. Bl-istess mod, Bin Alla għandu l-istess natura Divina bħal Missier.

Fil-vanġelu naqraw li darba minnhom il-Lhud riedu joqtlu lil Ġesù ‘għax qal li Alla hu Missieru, u b’hekk għamel lilu nnifsu daqs Alla’ (Ġw. 5:18). Kristu kkonferma li fehmuh sewwa billi qalilhom li l-ħwejjeġ kollha li jagħmel il-Missier, jagħmilhom l-Iben ukoll. Hekk kif l-Missier iqajjem il-mejtin, l-Iben jagħti l-ħajja lil min irid, u jagħmel ġudizzju minn kulħadd.

Jista’ xi ħadd maħluq, bniedem jew anġlu, kbir kemm hu kbir, jgħid dawn il-ħwejjeġ fuqu nnifsu? Jista’ il-maħluq jagħmel il-ħwejjeġ kollha li jagħmel il-Missier, iqajjem il-mejtin u jagħmel il-ġudizzju ta’ l-Aħħar Jum? Ikun jidgħi jew tilef ir-raġuni jekk sempliċi bniedem iqis lilu nnifsu daqs Alla.

Issa jekk ma rridux nakkużaw lil Kristu b’dagħwa jew ġenn, kif għamlu l-għedewwa tiegħu fi żmienu, ikollna naffermaw li Ġesù tkellem il-verità, u li t-titlu Bin Alla hu stqarrija tad-Divnità tiegħu.

Din hi l-blata soda li aħna l-Insara nibnu ħajjitna fuqha. Fl-Iben għarafna lill-Missier, ilqajna l-imħabba tiegħu u nagħtuh l-ogħla ġieħ. Il-Mulej Ġesù qal li min jagħraf lilu jagħraf ’l Alla; min jara lilu jara Alla; min jilqa’ lilu jilqa ‘l Alla; min jobgħod lilu jobgħod ‘l Alla; u min jonora lilu jonora ‘l Alla. (ara Ġwanni 8:19; 14:7; 12:45; 14:9; 14:1; Mark 9:37; Ġwanni 15:23; 5:23).

Bl-aktar mod solenni l-Iben stqarr: ‘Jiena u Missieri ħaġa waħda aħna.’ L-udjenza fehmitu sew x’ried ifisser: ‘Int bniedem, tagħmel lilek innifsek Alla.’ Dawk li m’emmnuhx akkużawh b’dagħwa u riedu joqtluh; filwaqt li dawk li emmnuh, afdaw ruħhom f’idejh u tawh qima. Din hi ukoll l-għażla tagħna illum.

Ġesù bierek li Pietru meta sejjaħlu, ‘Bin Alla l-ħaj’. L-istess jagħmel lilna jekk nemmnu fih b’qalbna kollha. Infatti l-vanġelu inkiteb b’dan il-għan, biex nemmnu li Ġesù hu l-Kristu, Bin Alla, u biex billi nemmnu, ikollna il-ħajja f’ismu.

Marija, Id-Dixxiplu ta’ Kristu

2010-09-02T06:28:00.000+02:00

Mhux ta’ b’xejn Marija qalet li “kull nisel isejjaħli hienja,” Hemm żewġ raġunijiet ewlenin għaliex Marija hi mbierka għal dejjem. Sant Wistin jgħid hekk f’waħda mill-priedki tiegħu:

“Ħarsu ħuti, u aħsbu sew, nitlobkom, fuq dak li qal Kristu l-Mulej meta medd idu lejn id-dixxipli, ‘Dawn, araw, huma ommi u ħuti. Għax kull min jagħmel ir-rieda ta' Missieri li hu fis-smewwiet, dak huwa ħija, u oħti, u ommi’ (Mattew 12:49, 50). M’għamlitx il-verġni Marija r-rieda tal-Missier? Irrid ngħid, hi emmnet bil-fidi, nisslet bil-fidi, kienet magħżula mir-razza umana biex tkun hi li minnha jitwieled is-salvatur; hi kienet maħluqa minn Kristu qabel Kristu tnissel fiha. Iva, tassew, l-imqaddsa Marija wettqet ir-rieda tal-Missier. U għalhekk, għal Marija ifisser aktar li kienet dixxiplu ta’ Kristu milli kienet omm Kristu. Hija barka akbar għaliha li kienet dixxiplu ta’ Kristu milli kienet ommu. Għalhekk Marija kienet mbierka, għax anke qabel welldet, hi ġarret l-imgħallem tagħha f’ġufha.

“Araw jekk dak li qed ngħid hux minnu. Darba waħda waqt l-Mulej kien għaddej, iwettaq mirakli divini, u l-folol kienu mixjin warajh, waħda mara qalet: ‘Hieni l-ġuf li ġiebek u s-sider li rdajt.’ U kif wieġeb il-Mulej biex juri li l-hena m’għandniex infittxuha fl-irbit tal-familja? ‘Imma tassew ngħidlek, aktar hienja dawk li jisimgħu l-kelma ta' Alla u jħarsuha’ (Luqa 11:27, 28). Għalhekk mela, Marija wkoll hi mbierka, għax hi semgħet il-Kelma t’Alla u żammitha. Hi ħarset il-verità f’moħħha aħjar milli ħarset il-ġisem f’ġufha. Kristu hu l-verità; Kristu hu ġisem; Kristu bħala l-verità kien f’moħħ Marija; Kristu fil-ġisem kien f’ġufha, u dak li hu fil-moħħ u akbar minn dak li jinġarr fil-ġuf.

“Marija hija qaddisa, Marija hi mbierka, imma l-knisja hi aħjar mill-verġni Marija. Għaliex? Għax Marija hi parti mill-knisja, membru qaddisa, eċċezzjonali, u tassew tal-għaġeb, imma xorta waħda membru mill-ġisem sħiħ. Ladarba hu hekk, jirriżulta li il-ġisem hu akbar mill-membru. Il-Mulej hu r-ras, u Kristu sħiħ hu r-ras u l-ġisem flimkien. Kif naqbad ngħid? Ir-Ras tagħna hu divin, għandna lil Alla bħala r-ras tagħna.” (Sant Wistin, Omelija 72/A).

Marija hi mbierka għax welldet lill-Kristu, Marija hi Omm Alla skond il-ġisem. Dan hu privileġġ uniku fost il-bnedmin kollha u f’kull żmien. Iżda Marija tgawdi barka ferm akbar! Marija hi aktar mbierka għax hi dixxipli ta’ Kristu milli għax hi ommu, u dan għax emmnet fih u kienet obbidjenti għas-sejħa t’Alla.

Marija biss nisslet fija u welldet lil Ġesù, u aħna ma nistgħux ikollna sehem minn dak il-privileġġ, imma ma’ Marija aħna wkoll nistgħu nissieħbu fl-għola barka. L-evanġelju jsejjaħ lill-bnedmin kollha għall-indiema u l-fidi fil-Mulej Ġesù. Dawk minna li nemmnu l-Kelma t’Alla, nafdaw fi Kristu għas-salvazzjoni ta’ ruħna, u ngħixu f’ubbidjenza għall-Missier, aħna wkoll dixxipli ta’ Kristu u membri fil-ġisem tiegħu. Aħna wkoll għandna sehem mill-akbar barka li Kristu jsejjħilna ħija, oħti u ommi!

L-Istima Għolja ta’ Ġesù għall-Iskrittura

2010-08-01T11:34:00.000+02:00

Qed ngħixu fi żmien li fih l-Bibbja hi attakkata minn kull naħa, sikwit minn dawk li jsejħu lilhom infushom Nsara. Imma x’kien jaħseb Ġesù fuqha? Kien jaħseb li fija ineżatezzi u żbalji? Jew kien iqisha bħala blata soda ta’ min joqgħod fuqha?

Dawk minna li nsejħu lilna nfusna segwaċi ta’ Kristu għandna ħafna x’nitgħallmu mill-attitudni tal-Imgħallem għall-Kotba Mqaddsa.

L-Iskrittura kienet għalih il-ġwida morali u spiritwali. Meta kien imġarrab fid-deżert, Ġesù ħa d-deċiżjonijiet tiegħu skond it-tagħlim tal-Iskrittura, u għal tlett darbiet stqarr, ‘hu miktub... terġa’ hu miktub... għax hu miktub’ (Mattew 3:3; 4:4,7,10).

Fid-diskors tal-muntanja, Ġesù ma biddel xejn mit-tagħlim tat-Testment il-Qadim, imma saffih mit-tifsira żbaljata u ż-żieda tal-għalliema Lhud. ‘La taħsbux li ġejt biex neqred il-liġi, jew il-profeti: jien ma ġejtx biex neqred iżda biex inwettaq. Għax tassew ngħidilkom: sakemm jgħaddu s-sema u l-art, jota waħda jew nitfa waħda ma titneħħiex mil-liġi, sama jseħħ kollox’ (Mattew 7:17,18).

Skond Ġesù xejn mit-tagħlim tal-Bibbja ma jista’ jiġi nieqes, u kulma kien profetiżżat jitwettaq kollu. ‘Jeħtieġ li jseħħu l-ħwejjeġ kollha, li nkitbu fil-liġi ta’ Mosè, u fil-profet, u fis-salmi, fuqi’ (Luqa 24:44).
Fit-tagħlim tiegħu Ġesù kien ta’ spiss jirreferi għall-Iskrittura. ‘Ma qrajtux din l-Iskrittura,’ kien jistaqsi lis-semmiegħa tiegħu (Mark 12:10). Kien jistenna minnhom li għandhom ikunu jafu l-Kotba Mqaddsa.
Kien juża l-Iskrittura bħala l-għajn u l-kejl tat-tagħlim etiku u spiritwali. Meta l-Lhud staqsewh fuq id-divorżju, weġibhom: ‘Ma qrajtux li sa mill-bidu l-Ħallieq għamilhom raġel u mara?’ (Mattew 19:4). Sabiex iċanfarhom minħabba l-qima falza, Ġesù qalilhom: ‘Hu miktub, Dari tissejjaħ dar it-talb; iżda intom għamiltuha għar tal-ħallelin’ (Mattew 21:13).

Meta ried jikkoreġi t-teoloġija tas-Sudduċej, qalilhom; ‘Kemm sejrin żball għax la tafu l-Iskrittura u lanqas il-qawwa t’Alla,’ waqt li rreferihom għall-ktieb tal-Esodu. U kompla: ‘Ma qrajtux dak li qalilkom Alla, li jgħid: Jien hu Alla ta’ Abraham’ (Mattew 22:29ff). Il-kliem tal-Iskrittura, għalkemm miktub sekli qabel, kien il-messagg t’Alla għalihom fi żmienhom. L-Iskrittura hi l-Kelma t’Alla għalina llum!

Kristu kien iżomm il-poplu t’Alla u l-mexxejja reliġjużi responsabbli biex jgħallmu, jemmnu u jobdu l-Kelma t’Alla miktuba fl-Iskrittura, u ċanfarhom għax effettivament kienu warrbu l-Iskrittura bit-tradizzjonijiet tagħhom (Mark 7:1-13).

Meta ried jgħallimhom fuqu nnifsu, ikkwota mis-Salmi u qalilhom: ‘David, imnebbaħ mill-Ispirtu, isejjaħlu Sidu’ (Mattew 22:41). Darba oħra, meta l-Lhud akkużawh b’dagħwa għax saħaq li hu Bin Alla, Ġesù weġibhom, ‘Fil-liġi tagħkom ma hemmx miktub...? L-Iskrittura ma tistax titħassar’ (Ġwanni 10:34,35). U sabiex jgħallem lid-dixxipli t-tifsira tal-passjoni u l-mewt tiegħu, ‘beda minn Mosè u l-profeti kollha jfissrilhom kull ma kien hemm fl-Iskrittura fuqu’ (Luqa 24:27). Infatti Ġesù għallem li hu nnifsu kien il-messaġġ ewlieni tal-Iskrittura. ‘Fittxu fl-Iskrittura; għax fiha taħsbu li għandkom il-ħajja ta’ dejjem; hija hi li tagħti xhieda tiegħi’ (Ġwanni 5:39). Jekk irridu nagħrfu lill-Mulej Ġesù, irridu nitgħallmu l-Ktieb li jitkellem fuqu.

Fi ftit kliem, l-Iskrittura hi l-Kelma awtentika t’Alla għalina llum; il-verità ċerta li ma tinbidel qatt. L-Iskrittura hi l-ogħla awtorità – ‘il fuq mit-tradizzjoni u l-opinjoni umana. Il-Bibbja hi x-xhieda t’Alla għal Ibnu Ġesù, biex nifhmu min hu u x’għamel, u biex nemmnu fih għall-ħajja eterna.

Il-Faraġ fil-Mewt

2010-07-01T09:01:00.000+02:00

B’riħ jew b’riefnu minn hawn irridu nsiefru! Il-mewt hi realtà kiefa u inevittabli. Ix-xogħol tiegħi ta’ spiss jlaqqgħani mal-mewt, imma t-telfa ta’ missieri sentejn ilu kienet l-agħar esperjeza u ħallietli vojt kbir.
Xi darba jew oħra jien ukoll irrid inħalli din id-dinja. Nistqarr li mhux dejjem għamilt it-tajjeb u mhux dejjem obdejt ‘l Alla. Il-ħsieb li jien, midneb, irrid nidher quddiem Alla ġust u qaddis hu tassew tal-biża’.

X’tama jista’ jkolli jien fuq is-sodda tal-mewt biex immut fil-paċi?

Il-patri Benedittin, Anselmu ta’ Canterbury, jindirizza lil moribond f’sensiela ta’ mistoqsijiet u tweġibiet -

Mistoqsija: Temmen li il-Mulej Ġesù Kristu miet għalik?
Tweġiba: Iva, nemmen.

Mistoqsija: Tirringrazzjah għall-passjoni u l-mewt tiegħu?
Tweġiba: Iva, nirringrazzjah.

Mistoqsija: Temmen li ma tistax issalva ħlief bil-mewt tiegħu?
Tweġiba: Iva, nemmen.

Ladarba jikkonferma li tassew jemmen fi Kristu, Anselmu jfarrġu b’dan il-kliem:

“Ejja mela, sakemm għad fadal fik in-nifs, ħa jkollok fiduċja sħiħa fil-mewt tiegħu biss, ħa ma jkollok ebda fiduċja f’xejn aktar, afda lilek innifsek f’mewtu, b’mewtu għatti lilek innifsek, u jekk il-Mulej Alla tiegħek jitlob minnek il-ħaqq, għidlu, ‘Mulej, bejni u bejn il-ġudizzju tiegħek, noffri l-mewt tal-Mulej Ġesù Kristu; m’għandi ebda difiża oħra quddiemek.’ U jekk jgħidlek li inti midnb, għidlu, ‘Mulej, inqiegħed il-mewt tal-Mulej Ġesù Kristu bejnek u dnubieti.’ Jekk jgħidlek li ħaqqek il-kundanna, għid, ‘Mulej, inqiegħed il-mewt tal-Mulej Ġesù Kristu bejnek u l-għemejjel ħżiena tiegħi; u noffri l-merti tiegħu minflok il-merti li messni għandi u m’għandix.’ Jekk jgħidlek li mgħaddab għalik, għidlu, ‘Mulej, impoġġi l-mewt tal-Mulej Ġesù Kristu bejni u l-għadab tiegħek.’ U meta tkun lestejt, għid mill-ġdid, ‘Mulej, inqiegħed il-mewt tal-Mulej Ġesù Kristu bejni u bejnek.’”

Dak li kien jgħodd elf sena ilu fi żmien Anselmu, għadu jgħodd għalija llum ladarba jien midneb bħan-nies ta’ qabel, Alla jibqa dejjem ġust u rett, u l-Mulej Ġesù għadu sal-lum isalva lil dawk li bih jersqu lejn Alla.

Lil dawk li jafdaw fi Kristu, l-Iskrittura tassigurana li “Alla jirrikmanda l-imħabba tiegħu lilna, billi meta konna għadna midinbin, Kristu miet għalina. Aktar u aktar mela, billi aħna ġġustifikati b’demmu, inkunu salvati mill-għadab permezz tiegħu” (Rumani 5:8-9).

Din mela hi l-unika tama tiegħi: Kristu miet għalija! F’dak il-jum, il-Mulej jeħlisni mill-għadab u l-kastig li ħaqqni għax minn issa stess Alla jgħoddni ġust minħabba d-demm li Kristu xerred għal maħfra ta’ dnubieti.

U int ħabib, qiegħed tafda s-salvazzjoni ta’ ruħek fi Kristu? Għidtlu minn qalbek lil Alla: ‘Mulej, inqiegħed il-mewt tal-Mulej Ġesù Kristu bejni u bejnek’?

Għaliex it-Tbatija, Mulej?

2010-06-02T07:02:00.000+02:00

Għaliex il-mard, l-uġigħ u l-mewt? Ladarba tista’ kollox, ladarba inti ħanin u twajjeb, għaliex, Mulej, tibqa’ ma tfejjaqx? Forsi ma tismax il-karba tal-marid, jew ma tarax id-dmugħ fuq ħaddejna?

Inti l-Ħallieq tas-sema u l-art; fil-bidu ħlaqt kollox tajjeb, lilna sawwartna fuq xbieha tiegħek, sejjaħtilna biex ingawdu xirka miegħek, u wissejtna bis-sħiħ li d-dnub inissel il-mewt. L-ewwel ġenituri ma obdewkx u ħaduha kontra tiegħek; l-istess aħna, bi dnubietna, komplejna nirribellaw kontra min għamilna.

Għalhekk illum madwarna ma narawx il-ġnien sabiħ tal-bidu, imma xewk, nixfa u taħsir. Fadal ftit mis-sabiħ tal-Għeden biex ifakkarna fit-tjieba ħelwa tiegħek. Imma issa l-ferħ imħallat bin-niket; mas-saħħa, il-mard; mal-ħajja, il-mewt, biex ma ninsew qatt kemm hu ikraħ id-dnub f’għajnejk u kemm hu morr il-frott tiegħu.

Kont wissejtna fil-bidu, u terġa’ twissina llum: Jekk nibqgħu bla ndiema, hemm tbatija agħar, l-infern, in-nar li ma jintefiex. Għallimni, Mulej, il-biża’ tiegħek biex nistkerraħ dak li inti tobgħod, id-dnub li ġab tant qerda. Agħtini qalb niedma biex nagħti dahri għall-ħażen, u nimxi fit-triq id-dejqa li twassal għall-ħajja.

Meta iżżurni bil-mard, Mulej, jien nibqa nafda fik għax int fil-kontroll perfett ta’ kollox; għasfur tal-bejt ma jaqax fl-art mingħajr ir-rieda tiegħek. Ħajti f’idejk, Mulej, jekk trid tista’ tfejjaqni, jekk le, ħa tkun magħmula r-rieda tiegħek. Inti ma ġġarrabnix għalxejn, imma tuża t-tbatija biex tilħaq għan tajjeb għall-ġid tiegħi u għall-glorja tiegħek.

Jekk ma nifhem xejn u bid-dmugħ ma narax ċar, għallimni nibqa’ sieket biex ma nlissinx kelma waħda ta’ protesta jew kelma ta’ dubbju fuqek. Meta tgħaddini mill-wied ta’ dell il-mewt, żgur ma tinsiex il-wegħda tiegħek, u ma tħallinix waħdi fid-dalma tal-lejl. Ibqa’ ħdejja, Mulej, għax inti l-għajnuna u l-faraġ tiegħi. Jien inbus l-id moħbija tiegħek u nqim minn qalbi lil Alla l-imbierek.

Ressaqni fid-dell tas-salib biex il-Kalvarju jkun l-iskola tiegħi, għax int ukoll xrobt mill-morr tal-ħajja u ġarrabt bħalna t-tbatija u l-mewt. Mulej, int ħallejt il-glorja tas-sema, għażilt li taqdi minflok tkun moqdi. Libbsuk kuruna tax-xewk, Sultan, neżżgħuk u dendluk mal-għuda misħuta. Ma kienx jistħoqqlok, ma kellek ebda ħtija; int tgħabbejt bil-mard u d-dnubiet tiegħi, u ħadt il-kastig li kien jixraq lili. Salibek, Mulej, hu l-fejqan tiegħi, u demmek naddafni minn kull tebgħa.

Għalhekk inħares ’il quddiem bit-tama; il-qabar mhux l-aħħar waqfa ta’ din il-mixja qasira. Bħalma rbaħt fuq il-mewt u qomt rebbieħ, b’ħiltek, Mulej, jien ukoll għad ngħix mill-ġdid meta bil-kelma qawwija tiegħek issejjaħli għall-qawmien tal-ħajja, tlibbisni b’ġisem li ma jitħassarx, timsaħ kull demgħa minn għajnejja u tfejjaqni minn kull marda, Dakinhar, Mulej, ma nistaqsix aktar, għaliex it-tbatija.

Għotja lil Alla

2010-05-01T22:51:00.000+02:00

Hu jagħti lil kulħadd il-ħajja u n-nifs u kollox.
(Atti 17:24)

Kont għadni daqsxejn ta’ tfajjel immur l-iskola tas-soru. Darba ommi tatni tmintax rbieghi (12c5) biex nagħtiha lis-soru. Xi jiem wara s-soru qassmet rigali mgeżwrin fil-brown-paper lit-tfal kollha tal-klassi. Qaltilna biex nagħtuhom lill-mamà fl-okkażżjoni ta’ Jum l-Omm. Niftakar sew kemm ferħet ommi bir-rigal tieghi – vażett ċkejen taċ-ċeramika ta’ lewn ħadrani. (Dan il-vażett għandu sal-lum fuq xkaffa fid-dar tal-ġenituri tiegħi).

Meta kbirt irrejalizzajt li r-rigal li tajt lil ommi kienet ħallset għalih hi stess!

F’sens aktar profond, x’nista’ nagħti jien lil Alla, il-Ħallieq u Sid is-sema u l-art? X’nista’ nagħtih jekk mhux dak li provdieli hu stess? Bħalma tgħid l-Iskrittura, “Min qatt ta l-ewwel lilu, biex lilu jinrtadd, għax minnu, u bih, u għalih, huma l-ħwejjeġ kollha” (Rumani 11:35, 36). Aħna totalment dipendenti fuq Alla: ħalaqna hu, tana l-ħajja u jżommna fl-eżistenza. “Aħna fih ngħixu u nitħarrku, u għandna l-eżistenza tagħna” (Atti 17:28). Kull nifs li nieħdu ġej minnu.

Għall-kuntrarju, Alla jeżisti fih innifsu, bla bidu, bla tmiem, u ma jiddependi fuq ħadd. M’għandux bżonn tal-anġli jew tal-bnedmin. Hu perfettament kuntent fih innifsu, kif kien mill-eternità qabel il-ħolqien. Aħna ma nistgħu nżidulu xejn. “Lanqas hu moqdi minn idejn il-bnedmin, bħalkieku jeħtieġ xi ħaġa, ladarba hu jagħti lil kulħadd il-ħajja u n-nifs u kollox” (Atti 17:24).

Kien hemm żmien meta kont naħseb li nista’ nixtri s-salvazzjoni ta’ ruħi – ngħix tajjeb, nitlob, immur il-knisja, nagħmel xi penitenza – insomma, naħdem biżżejjed biex fl-aħħar ikun ħaqqni l-Ġenna. Mhux hekk imorru l-affarijiet? Wara xahar xogħol nippretendi bi dritt li min iħaddimni jagħtini l-paga. L-employer huwa midjun miegħi u jien ħaqqni ħlasi.

Imma kif qatt nista’ nimmaġina li Alla jkun midjun miegħi? Kemm għandi bżonn nisma’ ċ-ċanfira ħelwa tal-Iskrittura, “Min qatt ta l-ewwel lil Alla, biex lilu jinrtadd?” Jekk nobdih, dan mhux id-dmir tiegħi? X’inkun għamilt speċjali? Mhux biss, jiena lil Alla sikwit ma obdejtux u ksirt il-kmandamenti tiegħu, u għalhekk, jekk xejn, ħaqqni l-kundanna u l-kastig. Iżda minflok tani dak li jistħoqqli, Alla ħafirli ħtijieti u laqgħani fi ħdanu. Meta sabni bla fejda u ħati, tani l-aqwa għotja – lil Ibnu Ġesù biex imut għalija fuq is-salib.

X’rigal naqbad nagħti lil Alla? Xejn ma nista’ noffrilu ħlief l-għotja ta’ tifħir u ringrazjament għall-ġid kollu li għamel miegħi – talli ħalaqni u jżommni ħaj, għall-ġenituri, ħuti, ħbiebi, għall-mara u t-tfal li tant iferrħuni – imma fuq kollox nirringrazzjah għal Ġesù, li fih jien insib il-milja ta’ ħajti. Naf li l-għotja tiegħi – qalbi stess – xtraha hu bid-demm ta’ Ibnu. Ommi kienet ħadet ġost bir-rigal ‘tiegħi’ u naf żgur li Alla wkoll jifraħ bl-imħabba ta’ wliedu.

Carpe Diem

2010-04-02T06:53:00.000+02:00

Ħa nieklu u nixorbu; għax għada mmutu.
1 Korintin 15:32

Il-qawl Malti jgħid, “Kul u tpaxxa għax min hawn għal ġol-kaxxa.” Jew, kif jirranġuna l-appostlu Pawlu, “Ħa nieklu u nixorbu; għax għada mmutu” - jekk il-mejtin ma jqumux.

Ħafna Maltin ma jemmnux, jew ma jimporathomx, jekk Ġesù qamx mill-mewt, jew jekk il-mejtin għadx jitqajmu fl-aħħar jum. Ma nafx int x’temmen, imma qatt ħsibt bis-serjetà x’inhuma l-implikazzjonijiet ta’ dan kollu? Jekk il-qabar huwa l-aħħar waqfa tal-vjaġġ qasir tagħna, x’attitudni għandna nieħdu għall-ħajja?

X’ikun l-iskop li tinkwieta u taħdem daqs kelb biex tmur tajjeb fl-eżamijiet, tibni dar, issir sinjur jew tilħaq fil-karriera tiegħek, jekk kollox jispiċċa bħad-duħħan? Jekk il-mewt ittemm kollox, kollox huwa assurd. It-tmiem tas-sinjur u l-fqir, tal-gharef u min ma jafx, ikunu l-istess – il-vojt, id-dlam, ix-xejn! Anke l-ferħ u t-tbatija, l-imħabba u l-mibgħeda, it-tajjeb u l-ħażin, jitilfu s-sinifikat jekk kollox iwassal għall-baħħ. It-tfal żgħar jilgħabu fuq xatt il-baħar, jibnu l-kastelli tar-ramel sakemm jitla’ l-mewġ u jniżżel kollox. Hekk ukoll aħna nibnu l-imperi ċkejkna tagħna fuq xatt l-eternità, nistennew li jiġi t-tsunami u jkaxakar kollox miegħu.

Mela ħalli ngawdu u niddevertu sakemm nistgħu! Ħa nieklu u nixorbu għax għada mmutu! Carpe diem, aħtaf il-jum – għax illum biss tiegħek, u għada m’għandek xejn. Ħalli niskru biex ninsew kemm hu vojt u assurd il-mument tal-eżistenza tagħna. Aħna passiġġieri fuq vapur li qed jergħeq f’nofs l-Atlantiku; ħalli mela nagħmlu party, nixorbu, indoqqu il-mużika u niżfnu sakemm nistordu ... mhux għax tassew ferħanin jew għax għandna x’niċċelebraw, imma biex ninsew kemm hu miskin u bla sens id-destin tagħna.

Imma jekk Ġesù qam, kif tgħallem l-Iskrittura, allura l-mejtin iqumu, jew aħjar, hemm Alla li jista’ kollox li jqajjem il-mejtin. Il-ħajja mhix assurda. Dak li nagħmlu f’din il-ħajja – tajjeb jew ħażin - għandu sinifikat tassew u konsegwenzi dejjiema.

Hekk mela, jekk mhux maħfur, il-ħażen huwa tagħbija li tinġarr 'l hemm mill-qabar għall-kundanna ta’ dawk kollu li sfidaw jew injoraw lill-Ħallieq tagħhom. Mill-banda l-oħra, jekk nemmnu fi Kristu, dnubietna huma maħfura, u minn issa stess nieklu u nixorbu bil-ferħ - mhux biex ninsew, imma għax niftakru f’Alla li jagħtina dawn l-għotjiet tajba. Aħna wkoll għandna sehem sħiħ mit-tbatija u l-għali ta’ din il-ħajja, imma t-tama tagħna tisfida saħansitra l-mewt. Għalina il-mewt mhix it-tmiem, lanqas il-kundanna, imma il-wasla fid-dar ta’ Missierna.

Ftakar Fija

2010-03-01T09:11:00.000+01:00

Mulej, ftakar fija meta tiġi fis-saltna tiegħek.
Ngħidlek is-sewwa li llum tkun fil-Ġenna miegħi.
(Luqa 23:42, 43)

Ma nafux meta, imma llum jew għada se tasal is-siegħa meta kull wieħed minna jrid jħalli din id-dinja. Il-mewt iġġib fi tmiemha l-ħajja f’din l-art, u tiftaħ il-bieb għal ħajja oħra, fil-preżenza t’Alla fil-Ġenna jew ’l bogħod minnu fl-Infern.

Ħabib, ippermetti nagħmillek mistoqsija serja. Taf x’inhu d-destin etern tiegħek; taf fejn sejjer wara li tmut? Fl-evanġelju l-Mulej Ġesù jagħtina tama ħelwa jekk aħna nafdaw fih. (Luqa 23:39-43).

Wieħed mill-irġiel li kienu msallba ma’ Kristu, illum jinsab il-Ġenna. Dakinhar stess li ħalla din id-dinja mar mal-Mulej fil-glorja. Dan nafuh għaliex il-wegħda ta’ Kristu ma tistax tfalli. Ladarba qallu, ‘Illum tkun miegħi’, nistgħu nibqgħu ċerti li hekk ġara - illum, dakinhar stess li miet, mar igawdi lil Kristu.

Imma nistaqsu, għaliex mar il-Ġenna? Forsi kien raġel bla dnub? Forsi kien raġel ġust għax għamel opri tajba u għex ħajja qaddisa? Forsi kien jistħoqqlu l-Ġenna?

Jekk kienx bla dnub jew le tgħidilna l-Iskrittura; tintroduċih ma’ sieħbu bħala ‘żewġ ħatjin’. Kien bniedem li għix fil-ħażen; il-professjoni tiegħu kien ħalliel. Hu stess ammetta dnubietu u stqarr li kien ħaqqu l-mewt. Lil sieħbu qallu, ‘Aħna qegħdin hawn għax jistħoqq għemilna.’ Le, ma marx il-Ġenna għax kien bla dnub; qiegħed il-Ġenna minkejja l-kotra ta’ dnubiet tiegħu.

Jew forsi nistgħu ngħidu li wara li ikkonverta, għix ħajja hekk tajba li fl-aħħar kien jimmerita l-ħajja ta’ dejjem? Le, lanqas ma nistgħu ngħidu hekk, għax hu nidem fl-aħħar jum ta’ ħajtu. Kieku kellu l-opportunità, bla dubbju, ħajtu kienet tinbidel mil-lejl għan-nhar. Lil dawk li jaħfer, il-Mulej iġedded ukoll u jgħinhom jgħixu tajjeb. Fl-istess ħin, miċ-ċirkostanzi partikolari tiegħu, naraw li ma marx il-Ġenna fuq il-merti tal-opri tajba tiegħu. Kif għidna, ikkonverta u ftit wara miet. Ma kellux merti personali, imma xorta waħda salva.

Fejn mela se nsibu r-raġuni għas-salvazzjoni tiegħu? Jalla l-Mulej jgħallimna mill-esperjenza tiegħu. Ma sabx is-salvazzjoni fih innifsu, jew f’dak li għamel b’idejh, imma f’Dak il-Bniedem Ġust imsallab ħdejh – fi Kristu! L-appell tiegħu kien biss għall-ħniena ta’ Kristu, ‘Mulej, ftakar fija meta tiġi fis-saltna tiegħek.’ Il-maħfra u l-mertu sabhom fil-Mulej Ġesù, u aħna, jekk nagħmlu bħalu, insibu l-fidwa tagħna wkoll.

L-Iben etern t’Alla ġie fid-dinja propju għal dan il-għan, biex hu li ma kellu l-ebda ħtija jieħu fuqu d-dnubiet tal-poplu tiegħu, u jpatti għalihom bil-mewt tas-salib. Kif jgħid il-profeta, ‘Hu kien miġruh minħabba ħtijietna, misħuq minħabba l-ħażen tagħna: il-kastig, li bih għandna s-sliem kien fuqu; u bil-flaġġellazzjoni tiegħu aħna fiqna. Bħal ngħaġ aħna lkoll intlifna; kulħadd sejjer għal triqtu, u l-Mulej tefa’ fuqu l-ħażen tagħna lkoll’ (Isaija 53:5, 6).

X’se tkun t-tama tiegħi meta nasal fl-aħħar nifs ta’ ħajti? Forsi ngħid, ‘Jien ħaqqni l-Ġenna għax m’inix midneb’? Jew forsi, ‘Jien ħaqqni l-Ġenna għax jien bniedem ġust’? Le, żgur li le! Bħal ħalliel nistqarr u nibqa’ nistqarr li jien midneb, jien ħati, jien ħaqqni l-kundanna; u mal-appostlu Pawlu, u ma dawk kollha li kellhom il-privileġġ jgħixu ħafna snin għall-Mulej, ilkoll nammettu li ‘mhux bl-opri tajba li konna għamilna, iżda skond il-ħniena tiegħu salvana’ (Titus 3:5).

X’se tkun mela l-fiduċja tiegħi fuq is-sodda tal-mewt? Il-Mulej Ġesù, il-Mulej Ġesù biss! Jien konvint li jekk illum insejjaħ ismu u nitolbu, ‘Mulej ftakar fija’; dakinhar il-Mulej mhux se jinsieni, dakinhar jiftakar fija, dakinhar jeħodni miegħu l-Ġenna.

e-vanġelu

2010-02-22T13:42:00.000+01:00

Bl-ghajnuna t'Alla, minn Marzu li gej se nibda nikteb messagg qasir fuq l-evanġelju. L-ghan tieghi hu li nxandar il-Mulej Ġesu' Kristu, ghax bih biss nistghu nsibu l-maħfra u l-ħajja ta' dejjem. Jekk tixtieq tabbona biex tirċieve l-e-vanġelu kull xahar b'email, sempliċement ibgħat email lil gospel@onvol.net
Il-paċi miegħek,
Joe.