L-isbah għotja
Fost l-għotjiet sbieħ u kotrana li tana Alla, m’hemmx oħla mil-Għotja li ma titfissirx bil-kliem. Alla tana lil Ibnu!
‘Tweldilna tifel, ngħatalna Iben; is-setgħa tkun fuq spallejh, u jsemmuh: Kunsillier tal-għaġeb, Alla setgħan, Missier għal dejjem, Prinċep tas-sliem’ (Isaija 9:6).
L-ismijiet glorjużi tas-Salvatur tagħna juru l-ħidma tiegħu u jikkorrispondu għall-bżonnijiet ta’ ruħna.
Kunsillier tal-Għaġeb
Fih tgħammar il-milja kollha tal-għerf u t-tagħlim. Isibna fid-dlam tal-injoranza spiritwali u l-qerq tad-dnub, u permezz tal-evanġelju jurina l-verità u jgħarrafna ‘l Alla.
Alla Setgħan
Ġesù għandu s-setgħa divina biex iwettaq il-missjoni ta’ salvataġġ li għalija ġie fid-dinja. Bil-qawwa tiegħu hu jxejjen l-avversarji kollha, jegħleb kull xkiel u jwassal il-poplu tiegħu għall-glorja.
Missier għal Dejjem
Ġesù hu l-awtur tas-salvazzjoni eterna ta’ dawk kollha li jħobbuh. Bħalma missier jieħu ħsieb uliedu, hekk ukoll Ġesù jħarishom u jiprovdihom, issa u għal dejjem.
Prinċep tas-Sliem
Sabna mifrudin minn Alla minħabba dnubietna u bil-kastig tal-infern imdendel fuq rasna. Ġesù ħa fuqu l-kastig li kien jistħoqq lilna meta ta ħajtu b’sagrifiċċju għal dnubietna. Is-salib tiegħu ħabbibna m’Alla.
Għalina twieled Ġesù; lilna ngħata Bin Alla. Ejja nilqgħuh. Ejja nemmnu fih b’qalbna kollha. Ejja nqimuh u nimxu warajh. Fih insibu l-għerf, il-qawwa, il-ħajja u s-sliem li ma jintemmu qatt.