L-istatwa tmil: in-Nisrani le!
Mhux l-ewwel darba li rajna videos fuq il-midja soċjali ta' statwi reliġjużi jitmejlu jew anke jaqgħu u jitkissru. Mhix xi ħaġa tad-daħk; anzi opportunità ta’ riflessjoni fuq x’jgħidilna Alla fuq l-istatwi:
“Bħan-nuffara f'għalqa ħjar, l-idoli ma jitkellmux. Trid terfagħhom, għax ma jimxux. La tibżgħux minnhom, għax deni ma jagħmlux, u riżq ma fihom xejn.” (Ġeremija 10:5)
Is-salmista (115: 4-7) jgħid li l-allat tal-pagani huma fidda u deheb, għemil idejn il-bnedmin, u b’disprezz ikompli:
“Għandhom il-fomm, u ma jitkellmux; għandhom l-għajnejn, u ma jarawx; għandhom il-widnejn, u ma jisimgħux; għandhom l-imnieħer, u ma jxommux; għandhom l-idejn, u ma jmissux; għandhom ir-riġlejn, u ma jimxux; ebda leħen ma joħroġ minn fommhom.”
Naturalment f'dawn il-versi l-Bibbja qed tirreferi għall-idoli tal-pagani. Imma milli jidher l-istatwi 'Nsara' m’humiex wisq aħjar minnhom. Il-vari tal-qaddisin ukoll jeħtieġ jintrabbtu biex ma jinqalbux, u jinġarru fuq l-ispallejn avolja għandhom ir-riġlejn.
M’hemmx li nirritornaw lejn il-fidi u l-prattika tal-knisja bikrija! L-Insara tal-bidu ma kellhomx statwi; kienu jqima ‘l Alla fl-Ispirtu u l-verità, kif jgħallimna il-Mulej Ġesù. Kienu jieħdu bis-serjetà t-tieni kmandament li jiprojbixxi il-qima t'Alla permezz ta’ xbiehat skolpiti maħdumin b’idejn il-bniedem.
L-istatwi imilu u jinqalbu ... imma aħna, jekk tassew nemmnu l-Kelma t'Alla, ma mmilux quddiemhom għax il-Kmandament tas-Sid, Alla tagħna, hu ċar kristall:
"La tagħmilx għalik suriet minquxa u ebda xbieha ta’ ebda ħaġa li hemm fl-għoli tas-sema, jew isfel fl-art, jew fil-baħar taħt l-art. La tmilx quddiemhom: la tadurahomx għaliex jiena hu l-Mulej Alla tiegħek, Alla għajjur, li npatti l-ħażen tal-missirijiet fuq l-ulied sat-tielet u r-raba’ ġenerazzjoni lil dawk li jobogħduni; imma nagħder sal-elf nisel lil min iħobbni u jżomm il-kmandamenti tiegħi" (Esodu 20:4-6).
