O kemm inħobbha l-liġi tiegħek!
Ġesù, il-Medjatur tal-Patt il-Ġdid, kisbilna privileġġ ewlieni – il-Mulej sar Alla tagħna, u aħna sirna l-poplu tiegħu (Ebrej 8:10). Alla seta’ jagħtina din il-barka indeskrivibbli għaliex Ġesù kisbilna l-maħfra (Ebrej 8:12) u tana wkoll qalb ġdida (Ebrej 8:10; Eżekjel 11:19-20; 36:26-27; Ġerimija 31:33).
Il-wegħda t’Alla, imwettqa fi Kristu, hi din: Jien “inqiegħed l-liġijiet tiegħi f’moħħhom u se niktibhom fi qlubhom” (Ebrej 8:10).
Dan il-vers mhux qed jirreferi għall-kuxjenza, peress li kull bniedem, Kristjan jew mhux, għandu fih għarfien bejn it-tajjeb u l-ħażin. Il-liġijiet t’Alla huma miktubin fil-qalb tal-poplu t’Alla fis-sens li issa għandhom ix-xewqa li jobduhom. Mhux biss jafu x’inhu tajjeb u ħażin, imma mill-ġewwieni tagħhom jixtiequ jagħmlu t-tajjeb u jiskartaw il-ħażin. Kull Kristjan jista’ jgħid ma’ Pawlu, “Jien nitpaxxa bil-liġi t’Alla fil-bniedem ġewwieni” (Rumani 7:22).
Huwa minnu li fl-esperjenza normali Kristjana jibqa’ fina l-kunflitt bejn it-tajjeb u l-ħażin, u li sikwit niżbaljaw u nidinbu. Imma appuntu, l-istess taqbida fina tixhed li issa hemm prinċipju ġdid jaħdem f'ħajjitna, peress li qabel il-konverżjoni ma kellna ebda xewqa ġenwina li nobdu l-liġi t’Alla.
Il-Kristjan jistqarr bil-ferħ, “O kemm inħobbha l-liġi tiegħek!” (Salm 119:97). Iħobbha u jitgħaxxaq fiha għal diversi raġunijiet.
1. Il-mifdija jissottomettu bil-qalb lejn il-Feddej tagħhom, u jridu jwettqu r-rieda tiegħu billi jgħixu fil-ġustizzja (Rumani 6:17-18).
2. Il-Kristjani huma konvinti li l-liġi hi mogħtija għall-ġid u l-ferħ tagħna (Ġakbu 1:25; Salm 1:1-2, 19:8).
3. Bl-ubbidjenza tagħhom il-Kristjani jesprimu mħabbithom lejn Sidhom. “Jekk tħobbuni,” qal Ġesù, “se żżommu l-kmandamenti tiegħi” (Ġwanni 14:15).
Fi ftit kliem, il-Kristjan iħobb il-liġi t’Alla għaliex iħobb lill-Mulej, Alla tiegħu.
