Marija, Id-Dixxiplu ta’ Kristu

Fil-Manifikat, Marija qalet, “Għax, ara, minn issa ’l quddiem il-ġenerazzjonijiet kollha
se jqisuni mbierka” (Luqa 1:48). Aħna wkoll, mal-Insara kollha matul iż-żminijiet, u minn qalbna, insejħu lil Marija hienja!

Hemm żewġ raġunijiet ewlenin għaliex Marija hi tassew imbierka għal dejjem. Santu Wistin jgħid hekk dwarha f’waħda mill-priedki tiegħu:

“Ħarsu ħuti, u aħsbu sew, nitlobkom, fuq dak li qal Kristu l-Mulej meta medd idu lejn id-dixxipli, ‘Dawn, araw, huma ommi u ħuti. Għax kull min jagħmel ir-rieda ta' Missieri li hu fis-smewwiet, dak huwa ħija, u oħti, u ommi’ (Mattew 12:49–50). M’għamlitx il-verġni Marija r-rieda tal-Missier? Irrid ngħid, hi emmnet bil-fidi, nisslet bil-fidi, kienet magħżula mir-razza umana biex tkun hi li minnha jitwieled is-Salvatur; hi kienet maħluqa minn Kristu qabel Kristu tnissel fiha. Iva, tassew, l-imqaddsa Marija wettqet ir-rieda tal-Missier. U għalhekk, għal Marija ifisser aktar li kienet dixxiplu ta’ Kristu milli kienet omm Kristu. Hija barka akbar għaliha li kienet dixxiplu ta’ Kristu milli għax kienet ommu. Għalhekk Marija kienet imbierka, għax anke qabel welldet, hi ġarret l-Imgħallem tagħha f’ġufha.

“Araw jekk dak li qed ngħid hux minnu. Darba waħda waqt li l-Mulej kien għaddej, iwettaq mirakli divini, u l-folol kienu mexjin warajh, waħda mara qalet: 'Hieni l-ġuf li ġabek u s-sider li rdajt.' Kif wieġeb il-Mulej biex juri li l-hena m’għandniex infittxuha fl-irbit tal-familja? ‘Imma tassew ngħidlek, aktar hienja dawk li jisimgħu l-kelma t'Alla u jħarsuha’ (Luqa 11:27–28). Għalhekk mela, Marija wkoll hi mbierka, għax hi semgħet il-Kelma t’Alla u żammitha. Hi ħarset il-verità f’moħħha aħjar milli ħarset il-ġisem f’ġufha. Kristu hu l-verità; Kristu hu ġisem; Kristu bħala l-verità kien f’moħħ Marija; Kristu fil-ġisem kien f’ġufha, u dak li hu fil-moħħ u akbar minn dak li jinġarr fil-ġuf.

“Marija hija qaddisa, Marija hi mbierka, imma l-knisja hi aħjar mill-verġni Marija. Għaliex? Għax Marija hi parti mill-knisja, membru qaddis, eċċezzjonali, u tassew tal-għaġeb, imma xorta waħda membru mill-ġisem sħiħ. Ladarba hu hekk, jirriżulta li l-ġisem hu akbar mill-membru. Il-Mulej hu r-ras, u Kristu sħiħ hu r-ras u l-ġisem flimkien. Kif naqbad ngħid? Ir-Ras tagħna hu divin, għandna lil Alla bħala r-ras tagħna.” (Santu Wistin, Omelija 72A).

Fi ftit kliem, Santu Wistin jgħallem li Marija hi tassew imbierka mhux l-aktar għax kienet omm Ġesù, imma għax emmnet, għamlet ir-rieda tal-Missier, u kienet dixxiplu fidil ta’ Kristu. Il-kobor tagħha jinsab fil-fatt li semgħet il-Kelma t’Alla u żammitha b’qalbha, tant li kienet iġġorr lil Kristu bil-fidi qabel ma ġarritu f’ġufha. Fl-aħħar nett, Wistin ifakkar li, għalkemm Marija hi qaddisa u eċċezzjonali, hi membru tal-Knisja, u għalhekk il-Knisja kollha — il-ġisem ta’ Kristu li tiegħu Hu r-Ras — hi akbar minn kull membru wieħed, anke minn Marija.

Marija hi mbierka għax welldet lill-Kristu; hi Omm Alla skont il-ġisem. Dan hu privileġġ uniku fost il-bnedmin kollha u f’kull żmien. Iżda Marija tgawdi barka ferm akbar! Marija hi aktar imbierka għax hi dixxiplu ta’ Kristu milli għax hi ommu, u dan għax emmnet fih u kienet ubbidjenti għas-sejħa t’Alla.

Marija biss nisslet fiha u welldet lil Ġesù, aħna ma nistgħux ikollna sehem minn dak il-privileġġ, imma ma’ Marija aħna wkoll nistgħu nissieħbu fl-ogħla barka. L-evanġelju jsejjaħ lill-bnedmin kollha għall-indiema u l-fidi fil-Mulej Ġesù. Dawk minna li nemmnu l-Kelma t’Alla, nafdaw fi Kristu s-salvazzjoni ta’ ruħna, u ngħixu f’ubbidjenza għall-Missier, aħna wkoll dixxipli ta’ Kristu u membri fil-ġisem tiegħu, il-knisja. Aħna wkoll jkollna sehem mill-akbar barka li Kristu jsejħilna ħija, oħti u ommi!